كود – كازا//

علنات السلطات الإيطالية أنها شدّات شاب عندو 21 عام، عندو الجنسية الإيطالية من أصول مغربية، للاشتباه فتورطو فقضايا مرتبطة بالإرهاب الدولي، بعدما نشر فمواقع التواصل الاجتماعي محتويات كتمجّد هجمات نفذها تنظيم داعش، وزاد عبّر على الرغبة ديالو فتنفيذ هجوم بحال العملية  اللي وقعات فمدينة مودينا مؤخرا ولي خلات 8 مضروبين  فـ15 ماي اللي فات.

وحسب وكالة الأنباء الإيطالية المشتبه فيه تزاد فطاليان من والدين مغاربة وكيعيش فجهة بريانزا، وكان فالمدودة الأخيرة كينشر ميساجات كتمجّد الاعتداءات ضد المسيحيين والدول الغربية، وكيشجع على لي سماع “الاستشهاد”، وهو الشي اللي اعتبراتو الأجهزة الأمنية مؤشر على تنامي الفكر المتطرف عندو.

وكشفات التحقيقات أن الشاب نشر قبل يومين  من توقيفو تدوينات وتصريحات على الإنترنت فيها إيحاءات بأنه مستعد يدير عمل عنيف، الشي لي خلا  النيابة العامة فميلانو دير أمر باعتقالو بتهم مرتبطة بالإرهاب.

وضافت المعطيات الأولية أن المشتبه فيه كان ناوي يسافر للمغرب نهار 9 يونيو، الشي اللي زاد من تخوفات السلطات الأمنية الإيطالية بخصوص احتمال انه يقدر يوجد ولا يشارك فأنشطة متطرفة خارج التراب الإيطالي.