كود سبور//

علم جورنال “گود” أن الجامعة الملكية المغربية لكرة القدم، حسمت بنسبة كبيرة الطاقم التقني د المنتخب الوطني المغربي بعد نهاية مرحلة وليد الركراكي.

وحسب المعطيات اللي توصلت بها “گود” فالمرحلة المقبلة فالمنتخب الوطني المغربي، غادي تكون بقيادة محمد وهبي مدرب المنتخب المغربي لأقل من 20 عام بطل العالم للشباب 2025، اللي عندو أسلوب قريب من الأساليب للى اعتمدت عليه المنتخبات الوطنية خلال السنوات الماضية، وغادي يكون معه فالطاقم التقني كل من البرتغالي جواو ساكرامنتو اللي فايت خدم كمساعد المدرب البرتغالي جوزي مورينيو، وغايكون معه حتى يوسف حجي اللي خدم مساعد مع طارق السكتيوي فالمنتخب المغربي الأولمبي والمنتخب المغربي المحلي والمنتخب المغربي اللي ربح كاس العرب، واخا الجامعة الملكية المغربية لكرة القدم كانوا باغيين رشيد بنمحمود يبقى مع الطاقم التقني.

المعطيات تشير أيضا أن هذه السيمانا غادي يتقدم الطاقم الجديد للمنتخب الوطني المغربي من طرف الجامعة الملكية المغربية الكرة القدم، وأن مسؤولي الجامعة برئاسة فوزي لقجع باغيين يبنيو على المكتسبات اللي كانت فالمرحلة اللي فاتت وآخرها دومي فينال مونديال 2026، والوصول إلى المركز الثامن عالميا، وأن المغرب باغي يزيد يحقق احسن من هذا الشي مستقبلا، ضمن مشروع كبير موجداه الفيديراسيون للمنتخب لتطوير النتائج اللي تحققت حتى لدابا.