كود كازا ///

باطرون ياميد كريم البقالي اللي فارض على اللي خدامين معاه يعيطو عليه “صاحب السعادة” متهم باللي ما كيخلصش الفورنيسور.

حسب ما علمته “كود” ف”صاحب السعادة” داخل فكونفلي مع بزافت الشركات الصغيرة والمتوسطة اللي كتعامل مع هاد الشركة ديال العقار.

هادو خدمو معاه ولكن كثار مازال ما خلصهمش. حسب هاد الشركات من غير لخلاص اللي مازال ما خلصهمش زايدها بالفوحان والتعجرف. طبعا كثار منهم خايفين يمشيو للقضاء حقاش شي وحدين طالقين باللي هو غير واجهة للاميرات.

كون كانو معاه الاميرات كون اول حاجة دارها يخلص اللي كيخدم معاه.

دابا هاد الطاشرون عندو سمعة خايبة باللي “موڤي پيايور” فعالم العقار.

“ياميد” مجموعة كتخدم فالعقار وفالسياحة وكيدير سكن ديال لمرفحين والڤيلات وحتى السكن الاقتصادي ومقر الشركات لكبيرة والابناك ولوطيلات. حسب “لوديسك” فهاد الشركة معروفة ب”قربها من الاميرات اللي شراوها حسب نفس الجريدة ف2021 بالسكوتي من ورثة “دو مينيبوس”

البقالي بدا فهاد الشركة من نهار تنشآت ف2013 ودخل فامور كتعارض وسياسة الدولة. رئيس الدولة ديما كيهدر علي دعم الشركات الصغرى والمتوسطة وصاحبنها كيعطل عليها لخلاص وكيزيد فمشاكلها وممكن افلاسها.

حتى الحكومة والباطرونا شددو باللي خاص يخلصو هاد النوعية من الشركات. وزير الداخلية يالله خرج بتصريح فهاد الاتجاه. مع تبعات كوفيد والازمة والجفاف الدولة دارت امور كثيرة باش تنقد الشركات الصغرى والمتوسطة. شفنا ضمان “اوكسجين” شفنا مشاريع كثيرة فهاد الاتجاه. يجي هاد الطاشرون ويضرب كلشي فالحيط

الطاشرون اللي كيقول ليهم يعيطو عليه “صاحب السعادة” كيخلع ماشي باسمو ولكن باسم لالاتو. هاد المجموعة اللي كيدبر 10 مليار درهم اكتيف ما كيخدم الا غدد قليل كيف قال فحوار سابق مع “ميديا 24”. علاش حقاش ماشي بناي او منعش عقاري غير كيعطي الاوامر وكيشرف على المشاريع. شركات صغيرة ومتوسطة هي اللي كيدير الخدمة.

دابا هاد الشركات اللي كيتسالوه لفلوس حاصلين. ما عارفين اش يديرو. خايفين يمشيو للقضاء.

طبعا هما غالطين. اكيد القضاء غادي ينصفهم واكيد الاميرات غاديين كيعاو علي هاد التأخير فالاداء