كود – وكالات //

كشفات العائلة الملكية النرويجية على تفاصيل دفن الملك هارالد الخامس، اللي توفى فـ28 غشت على 89 عام، من بعد 35 عام دوزها فوق عرش النرويج.

الملك هارالد الخامس تدفن فـ9 شتنبر فكاتدرائية أوسلو، ومن بعد تحطات الجثة ديالو فالسرداب الملكي ديال قلعة أكيرشوس، حدا جدو الملك هاكون السابع، وباه الملك أولاف الخامس، ومو ولية العهد الأميرة مارثا، اللي توفات ف 1954.

والتفاصيل اللي كشفت عليها العائلة الملكية نهار 18 شتنبر كتهم بالخصوص التابوت اللي اختارو الملك هارالد باش يكون المرگد الأخير.

التابوت منحوت على شكل سفينة ديال جوج الناس، ومصنوع من حجر الأوليفين الأخضر، وهو نوع من الصخور اللي كيرجع تاريخها ل 400 مليون عام، وكيستخرج من غرب النرويج.

وحسب القصر الملكي، هاد الحجر عندو خاصية امتصاص ثاني أوكسيد الكربون وتخزينو.،والمصممين اعتابرو هاد الخاصية رمز للحب ديال الملك هارالد والملكة سونيا للطبيعة، و للاهتمام ديالهم بالأجيال المقبلة.

والملك هارالد كان حتى هو كيهضر، فحياتو، على التابوت ديالو بطريقة فيها شوية ديال الضحك.

وكان قال: «كنتمنا يكون مفرش مزيان باش تكون الإقامة مريحة، على أي حال غادي نطولو فيه شوية».

وتدفن هارالد الخامس فمراسم خاصة فقلعة أكيرشوس، من بعد الجنازة الرسمية اللي تقامات فكاتدرائية أوسلو نهار 9 شتنبر.