• كود سبور//

اكد معاد الضحاك كابيتان المنتخب المنتخب الوطني المغربي لاقل من 20 عام، ان الأشبال معولين على الرباح فالفينال غدا ضد جنوب إفريقيا ويرجعو بكاس أفريقيا U20 للمغرب ويفرحو به المغاربة بحال منتخبات اقل من 17 و اقل من 23 عام.

وهضر معاد الضحاك خلال الندوة الصحافية اللي كاتسبق فينال كاس افريقيا لاقل من 20 عام، بين المغرب وجنوب إفريقيا غدا الاحد، وقال: “بغينا نرجعو بكاس افريقيا لاقل من 20 عام من مصر للمغرب ونفرحو المغاربة كيفما دارو اقل من 23 و اقل من 17 عام ومعولين على الرباح ضد جنوب إفريقيا ونديو لاكوب”.

وكمل كابيتان المنتخب المغربي وقال: “المغاربة طامعين فلاكوب حتى حنا اللاعبين طامعين فين، والأجواء وسط الگروب مزيانة بزاف گاع، فرحانين نمشيو نفطرو ونتغداو مجموعين ونمشيو نتعالجو ونمشيو ندبرو مجموعين فالحصة التدريبية الأخيرة اليوم وكانتسناو غير امتى غدا نكونو فالتيران ونبداو الماتش وندير اللي خاص يدار ونرجعو بكاس افريقيا للمغرب ونفرحو والدينا وگاع المغاربة، الفينال ماساهلش وجنوب افريقيا منتخب قوي ولكن حنا معولين نربحوهم وناخدو كاس افريقيا”.