گود سبور//

اعتذر إسماعيل الصيباري على الدخول ديالو فهداك التخربيق ديال فوطة گول المنتخب السنغالي إدوارد ميندي ففينال كاس أفريقيا بين المغرب والسنغال.

وعرف إسماعيل الصيباري راسو غالط وكان غير كايخربق ملي دار عقلو فشي وحدين من الجمهور اللي كانو ورا الگول ديال السنغال وشي رماسورا ديال الكواري اللي متيقين هذاك التخربيق ديال السحور وقالو بلي الگول السنغالي دايرو فالفوطة، ومع الأسف هذا الشي طيحو فيه حتى اللاعبين.

إسماعيل الصيباري وفتصريح لقناة ESPN برطاجاتو حتى شبكة RMC، قال بلي تلقى مع ادوارد ميندي فالمطار وطلب منو المسامحة على البلان ديال الفوطة اللي كان باغي ياخدوها له وسط الماتش، لدرجة ان الگول الثالث ديال السنغال مشى شد الفوطة وبقى ورا البوطو باش المغاربة ما يطيروهاش.

وقال إسماعيل الصيباري: “هذاك كان غلط وانا عارف الغلط ديالي وداكشي علاش طلبت المسامحة. ملي رجعت للدار شفت شحال هداك الشي خايب، وصيفطت ميساج فالبلاصة لواحد السيد فالسنغال واعتذرت، وطلبت المسامحة من ميندي فالمطار، وتحل المشكل وتسد الموضوع، وخاصنا نزيدو للقدام”.