أنس العمري – كود///
كلشي كيتسنى نتائج التحقيق في “صور المهاجرين لعريانين ولمضروبين فالفنيدق اللي خرجات ف16 شتنبر اللي فات. صورة صادمة شباب بغى حرك لقى راسو بكيلوطاتهم وكاين اللي باين علامات الضرب فظهرو.
الوكيل العام للملك لدى محكمة الاستئناف بتطوان، خرة بلاغ ف 17 شتنبر اي نهار باش بانت الصورة. فيها علن باللي امر النيابة العامة بفتح بحث فالموضوع. بقينا نتسناو. ومازال كنتسناو
صورة كتشوه لبلاد. فيها القوات المساعدة حدا هاد الشباب. الداخلية عبر عمالة لفنيدق كانت اكدات صحة صورة وحدة. باقي الصور هو اللي خرج فيهم بيان الوكيل العام.
كانت الفرقة الوطنية للشرطة القضائية تكلفات بعملية البحث. بعد يومين كانت فالفنيدق.
دابا فين هي النتائج. الوكيل العام قال فالبلاغ ديالو باللي “سيتم ترتيب الآثار القانونية اللازمة على ذلك فور انتهاء الأبحاث مع إشعار الرأي العام بنتائجه”.
وفين هاد الاشعار؟ واش غادي يكون هاد السيمانا او السيمانا اللي جاية او الشهر اللي جاي؟ نتسناو
