نوفل طرشول – گود
__________

غير قبل سنوات قليلة ماضية كنت حتانا بحال أغلب المغاربة عندي حساسية من كلمة إسرائيل وصهيونية، وكره غير مبرر لأي حاجة يهودية. وكنت ممكن نسب أي واحد بيّن بطريقة ما أنه ما كيكرهش إسرائيل وما متعاطفش مع فلسطين ظالمة أو مظلومة.
الوقت داز والوقت والعالم تغيروا وحتانا تغيرت معاهم. وهذا هو الطبيعي ف الانسان، يغير أراؤو وقناعاتو ملي تكون معطيات جديدة قدامو.

مؤخرا يلاه كملت كتاب “The Jewish State” ديال ثيودور هرتسل، الاب الروحي ومول الصهيونية اذا صح التعبير، أول واحد خطط لانشاء دولة للشعب اليهودي باش ما يبقاش يعاني الحگرة ف أوروپا والعالم. الكتاب، وعكس كتب القومجيين العرب، قصير والافكار مركزة وواضحة ولغتو إقتصادية وبالارقام بعيدا عن الشعارات الدينية ولا القومية الجوفاء. فيه هرتسل ناقش كيفاش غادي يشريو الارض ف منطقة فلسطين وكيفاش غيقنعوا ليهود ينتقلوا لها وكيفاش غيخدموا وشكون غيخلص شكون والضرائب منين غيجيو…الخ من النقط المهمة ف بناء أي دولة حديثة.

المستوطنين البريطانيين ف أمريكا الشمالية مارسوا لمئات السنين أبشع أنواع العبودية على الهنود الحمر اللي وقع الالتقاء معاهم. الهنود الحمر اللي اليوم كيشكلوا أقلية صغيرة بزاف ف منطقة كبيرة بحال الميريكان. تاريخيا تم القضاء عليهم بطريقة منظمة لفسح المجال للمستوطن الاوروپي.

على أي، المغربي اليوم ما عندوش مشكل مع تاريخ الميريكان الاسود، ولا المجازر اللي دارت ف حق شعوب بريئة. ولا حتا العبودية اللي عانى منها ملايين الافارقة الكوحل ف مزارع القطن والذرة ف الميريكان الى حدود أقل من قرن فات. المغربي ما كيدعيش لقطع العلاقات الديپلوماسية مع الميريكان ولا أي دولة دارت مجازر ف تاريخها، بل بالعكس، كيحلم يسلفر لها، لأن هاد الشعوب المحگورة بالنسبة ليه ما كتشبهش ليه ولا دينها هو دينو. التعاطف مع الفلسطيني هو تعاطف عاطفي، عاطفي حيت الفلسطيني كيشيه ليه، وعاطفي حيت حقد وراثي اتجاه اليهود، اللي كيبغي يغطيه بالاهتمام بالضحايا والاطفال، اللي كيموتوا ف سوريا يوميا بدون أي إهتمام منو.

نعم، إسرائيل ارتكبت جرائم خلال تاريخها بحالها بحال گاع الدول من بينهم المغرب، لكن هاد الجرائم كانت دفاعا عن شعبها وسلامتو وراحتو، الشي، اللي بدل التباكي عليه ليل نهار، من أهم النقط اللي خاص أي مغربي يحسد عليها المواطن الاسرائيلي، اللي دولتو كتقتل باش يقدر ينعس بالليل بسلام، عكس المغربي اللي هو بالنسبة للدولة مجرد رقم زايد ناقص واللي مستعدة تقتلو باش غير ما تسمعش صداعو.

هذا ماشي دفاع على الصهيونية ولا إسرائيل، قادرين يدافعوا على راسهم ونجخوا في ذلك من نهار بداو، لكن دعوة للتحكم للعقل والمصلحة والابتعاد على العواطف في الحكم على الامور. إسرائيل ما سبقش لها هددت المغرب ولا اذات أي مغربي، دولة اللي بعيدة علينا وما كتشكل علينا حتى خطر ولا ممكن تشكلو علينا مستقبلا.

الصهيونية قدرت تبني دولة علمانية لشعب دينو أكثر تشددا من الاسلام، لشعب اللي الدين جزء رئيسي من هويتو ونظرة العالم ليه. رغم ذلك قدرت تخلق مجتمع اللي الدين حاجة خاصة والفضاء العام للجميع، مجتمع اللي كيتقبل الجميع باختلافهم وتنوعهم، اللي كيتقبل حتى مسيرات الفخر ديال المثليين ف أهم شوارعو.

الحركات القومية جات ومشات ف المنطقة، أغلبها كانت يوتوبية قمعية هدفها الايديولوجية ماشي الانسان، إلا الحركة الصهيونية، اللي مازال مستمرة وفي تقدم مستمر على جميع المستويات ومواطنيها في تقدم وازدهار واكثر سعادة من باقي شعوب المنطقة. حركة اللي رغم انها دايرين بيها الاعداء ما رتكبت حتى مجزرة ممكن توصل للمجازر اللي رتكب صدام ولا الاسد مؤخرا ف شعبو، اللي برلمانها كيسمح لنوابو العرب انهم يكونو ضدها بدون ما يتعرضوا لا لقتل لا لاعتقال. الحركة اللي منذ تأسيس دولتها والعرب والعربية جزء منها ومعترف بيه عادي. الشي اللي سنين وجزء مهم من المغاربة فقط كيحلموا بيه.

التطبيع مع إسرائيل أمر لا مفر منه. إسرائيل اليوم من الدول المهمة حاليا ف العالم ف عدة مجالات. التطبيع الحالي، اللي تحت الطبلة واللي حتا واحد ما يقدر ينكرو، هو فقط ف مصلحة الريوس الكبار، المغربي العادي ما كيستافد والو من العلاقات الفاسية-الاسرائيلية.
الجهل هو السبب الاول ديال الكراهية كيما كيقولو، نهار يفتح المغربي عينو ويشوف اللمور كيما هي منطقيا وبلا عاطفة، غادي يعرف باللي إسرائيل مثال حي ديال كيفاش كان خاص يكون المغرب، درس اللي خاصنا نتعلموه ماشي نكرهوه.