گود سبور//

عبر عبد الحق الصنايبي اللي كانو غادي يديروه الوداد الرياضي ناطق رسمي للنادي، على الاستغراب ديالو من تراجع الرئيس براهيم العسري على التعيين ديالو، واكد ان هذا القرار جا بضغط إيراني ماشي الوداديين.

الصنايبي خرج بفيديو على الصفحة ديالو بفيسبوك، وشرح كيفاش تواصل معه براهيم العسري واقترح عليه بوسط الناطق الرسمي باسم الوداد الرياضي، وانه وافق فالبلاصة وكان مستعد يقدم الخدمات ديالو فابور بسبب الأزمة اللي كايدوز منها النادي، قبل ما يتفاجأ بإعلان الوداد التراجع على التعيين ديالو، وانه القرار جا بلا خبارو.

ووضح عبد الحق الصنايبي ان تراجع براهيم العسري على التعيين ديالو ناطق رسمي للوداد الرياضي، جا بضغط من العائلة الإيرانية وماشي ضغوطات العائلة الودادية، وتأسف لهذا الشي وتمنى التوفيق للوداد وقال انه دائما كان ودادي، وتمنى التوفيق للاندية الممثلة للمغرب فالمنافسات القارية.

وكانت فئة كبيرة من جمهور الوداد الرياضي طلقت حملة باش يتراجع المكتب المديري للنادي برئاسة براهيم العسري على قرار تعيين عبد الحق الصنايبي، ومبررها انه كايجي من إسرائيل فالصراع الاسرائيلي الفلسطيني، ومادازش يوم واحد حتى تراجعو الوداد على التعيين ديالو.