محمد سقراط-كود///
بالنسبة ليا الصف هو لي كيميز القرودة على بنادم، واخا حنا في لأصل ولاد العم ولكن لي خلانا نتطورو ونخرجو من الغابة ونبعدو عليهم هو فاش تعلمنا نشدو الصف، طبعا ماشي كولشي خرج من الغابة كاين لي باقي فيها سواء غابة الشجر أو غابة السيما والياجور، حتى التحضر ديال أي شعب يمكن يتقاس من مدى إحترامه للصف وللناس لي سبقوه، من غير طبعا الصف لي كانو كيديرو في الإتحاد السوفياتي على الحليب والمواد الغذائية باش يشدوه بالبون، مثلا الرباط مدينة حضارية لأنهم كانو سباقين للصف( الرباط السونطر طبعا)، فاش كانو طنجاوة باقين كيتقاتلو على الطاكسي في البارادا دبني مكادة، كيبانلك الطاكسي يالله باغي يوقف وخاص تعرض ليه وتشد فالباب وهو غادي ونتا كتجري باش فاش يوقف يلقاك شاد في الباب مستعد تركب، طبعا الناس لكبار النسا الحاملات أو لي معاهم الدراري الصغار الناس لمراض هادوك بقاو تما، كان خاصك تكون جون سينا باش تشد طاكسي.
في داك الوقت طلعت للرباط لقيت السلاويين دايرين صف طويل كيخلع على الطاكسي في باب شالة بالرباط، واقفين في نظام وإنتظام وبلا بوليسي بلا مخازني بنادم خارج من الخدمة عيان ويزيدها بالمقاتلة على الطاكسي، وحتى في الحوانت فداك المنطقة نيت كتكون واقف كتقدى شي لعبة مكيجيش شي واحد من وراك ويقوليه واحد جوج ماركيز وورقة معاك، زعمة راه حالة مستعجلة بنادم كيدخل كيتسنى نوبتو كيتقدى كيزيد، حتى البوسطة كانو الناس كيوقفوا بالصف، طبعا هادشي ماشي الرباط كلها في هاد الوقت نيت راه كانو كاع الحوانت في جي سانك والتقدم والبيتات وجبل الرايسي دايرين الكرياج وخدامين غير من الطاقة صغيرة حط الفلوس عاد يجيب السلعة، في إنزكان كان واحد الهيت آخر خرجت من المحطة بغيت نشد طاكسي لقيت شي شمكارة هوما لي كيشدو للناس البلاصة كيضاربو في بلاصتهم وتدور معاهم، حتى تشد طاكسي ولات خدمة بمقابل في إنزكان.
حاليا في المغرب كامل تقريبا كاين مشكل كبير ديال الصف كيبانليك بنادم زربان وباغي يفوتك وهو ماغادي فين أصلا، شي مناظر ممفهوماش، مثلا يضوبلك واحد في الخط متاصل أو في بلاصة مزاحمة باش يوقف، يتسنى نص دقيقة كان يوقف على خاطرو بلا مايغامر بحياتو وحياة الناس، أما في الإدارات داكشي بالنماري يا حسرة وبنادم باغي يهرف ويدوز ويسبق واخا حتى الكرسي يريح عليه يتسنى مايقدش، كيبقى سامر على الغفلة، في اللخر غادي يخرج ويمشي غير يريح في القهوة ماشي غادي يدير الطايلة بالوقت لي ربح، هادشي طبعا المدرسة ولأسرة هي لي كتعلموا بإشراف من الدولة لي كتحرس أنه يتطبق بنظام ديال العقوبات والغرامات لي كتفرع الواحد في جيبو، الإنسان الأوروبي راه ماشي تزاد مربي ولا كان ديما هاكا، راه قرون وهو غير كيقتل في بعضياتو بشتى الطرق، وحتى دابا بزاف كون مكانش النظام غادي يربجوها خرق للقانون، ولكن كاين دولة حقيقية كتفرض القانون تجاوزتي السرعة حرقتي الضو كاع داكشي ديال شغل الزربة كتفرعك في جيبك، وبنادم هاهو تربى بحال الخليج نيت، حتى المغرب راه هادشي لي خاص يدير الرادارات والكاميرات في أي بلاصة ولي حصل يودي باش يتربى بنادم وينقص من هاد الزربة واللهفة والقفوزية الخاوية.
