كود الرباط//

كانت “كود” سباقة، ف 29 فبراير 2024، إلى الكشف عن تفاصيل صراع بين الموظفين فمجلس المستشارين على شكون يدبر واحد الحصيصة ديال 1 مليار و500 مليون كانت شاطت من صندوق تقاعد البرلمانيين بعدما تمت تصفية هاد الصندوق، وكان قرر مكتب الغرفة الثانية فعهد الرئيس السابق النعمة ميارة تحويل هاد لفلوس كلها لحساب جمعية الأعمال الإجتماعية لموظفي مجلس المستشارين (كانت فالأصل 3 د لمليار لكن السيديجي شدات النص من هاد لفلوس لي كانت ما تبقى من مساهمات المستشارين البرلمانيين في صندوق التقاعد ديالهم بعد ما تمت تصفية الصندوق). هاد الصراع على مليار ونص كان السبب الرئيسي فعقد جمع عام استثنائي لجمعية الأعمال الإجتماعية العام الفايت وتمت الاطاحة برئيس الجمعية وانتخاب رئيس جديد.

هاد الصراع رجع من جديد بعدما قرر المكتب الجديد لجمعية الأعمال الإجتماعية للموظفين عقد جمع عام للمصادقة على قرار باش يتم تحويل هاد لفلوس من حساب الجمعية لحساب ودادية سكنية تدارت خصيصا لهاد لغراض.

أطر مجلس المستشارين لي كيعرفو حيثيات الموضوع تحفضو على هاد القرار ديال التحويل، بل أن شي وحدين منهم تدخلو فالجمع العام لي تعقد هاد الخميس 11 ابريل باش ينبهو رئيس الجمعية لخطورة هاد القرار لي فيه شبهة خرق القوانين الجاري بها العمل. واحد من المصادر لي سولاتها “كود” تساءل: كيفاش سيتم تحويل مليار ونص من جمعية بقانون أساسي خاص إلى ودادية بقانون أساسي آخر لتوظيف هذه الأموال في مشروع سكني تحت إشراف مكتب الودادية؟.

هاد الشي خلق صراع بين مكتب الودادية، من جهة، ومكتب جمعية الأعمال الإجتماعية، من جهة أخرى، بل أن نقابة موظفي مجلس المستشارين تدخلات من جهتها فهاد الصراع على مصير هاد مليار ونص، وكل واحد من الأطراف الثلاثة كيجر من جهتو باش يشرف على تدبير هاد لحصيصة لكبيرة ديال لفلوس، وكاد هاد الصراع يفجر الجمع العام ديال الجمعية.

فهاد الإطار، مازال مجلس المستشارين يرفض البث فمشروع القانون المتعلق بإحداث مؤسسة الأعمال الإجتماعية لموظفي البرلمان، هاد القانون لي كان صادق عليه مجلس النواب وملي تحال على مجلس المستشارين بقا مجمد فاللجنة المختصة لي دارت عليه باراج حتا يتم تشكيل الودادية السكنية ويتم تحول هاد الأموال للودادية عاد يتم المصادقة على مشروع القانون المتعلق بمؤسسة الأعمال الإجتماعية لموظفي البرلمان.

كود” كانت نشرت نقلا عن مصادرها، بلي هاد الخالوطة الجالوطة ممكن تنتهي أمام القضاء. مصادر قالت بلي، فعلا، هناك موظفون بالمجلس كينتاظرو فقط تحويل هاد مليار ونص من الجمعية للودادية باش يطعنوا فقرار التحويل أمام القضاء، لأنهم عارفين بلي ما كاين لا ودادية لا مولاي بيه. للي كاين هو أن شي جهة باغا تدير شرع يديها وتهرف على هاد الحصيصة ديال مليار ونص بدون موجب قانوني، كيقول المصدر.