كود – كازا//

توفى الصحافي والمفكر المغربي حميد برادة نهار الجمعة 25 شتنبر 2026، على86 عام، من بعد مسار طويل عامر  بالإعلام والفكر والسياسة والأكاديميا، على كتر من 60 عام.

الراحل  تزاد ف 1939 فمدينة طنجة، وقرا فـالمدرسة الإسلامية الحرة وثانوية «ريغنو»، ومن بعد تخصص فالفلسفة والقانون وعلم الاجتماع السياسي.

برادة بان بكري فالنشاط الطلابي والسياسي، وتنتخب ف 1962 رئيس للاتحاد الوطني لطلبة المغرب، قبل ما يدخل من بعد فمرحلة ديال العمل السري والمنفى.

فالمجال الإعلامي، ارتبط سميتو بمجلة «جون أفريك»، فين خدم كصحافي ومراسل، قبل ما ياخد  رئاسة التحرير بين 1974 و1985. هاد المرحلة عززات الحضور ديالو فالصحافة الفرنكوفونية.

ومن بعد، خدا  منصب مدير منطقة المغرب العربي والشرق الأوسط فقناة «TV5». وفالمغرب تعرف عليه الجمهور بشكل كبير مع  البرنامج الثقافي «Mais Encore» على القناة الثانية «2M»، اللي قدمو من 2007 حتى لـ2018.

المسار ديالو ما وقفش غير عند الصحافة، ولكن  جمع بين التدريس الجامعي، وإخراج الأفلام الوثائقية، والمشاركة فجلسات هيئة الإنصاف والمصالحة.

وقبل موتو، خرج  ف 2025 الجزء الأول من «أنطولوجيا الحوارات»، وهو مؤلف كبير  جمع ووثق حوارات تاريخية ديالو مع عدد من كبار الشخصيات السياسية والفكرية، من بينهم الملك الحسن الثاني، وعبد الرحمان اليوسفي، وعبد الله العروي.

بموت  حميد برادة، كيسالي فصل من مسار مهني وفكري امتد لأكثر من 60 عام، وكيخلي وراه أرشيف غني من الحوارات والكتابات والشهادات اللي كتساهم فتوثيق الذاكرة السياسية والمغاربية.