وكالات//

طالب رئيس الحكومة الإسباني، بيدرو سانشيز، نهار الاثنين، بإبعاد إسرائيل من مسابقة “يوروفيجن” الغنائية الأوروبية، وأكد على ضرورة إظهار التضامن مع الشعب الفلسطيني اللي كيعاني من الحرب والقصف اللي ما عندو حتى معنى.

وقال سانشيز، حسب ما نقلاتو وكالة “فرانس برس”: “ما يمكنش نكونو كنديرو معايير مزدوجة فـ الثقافة”، وشرح أنه إلى تم إقصاء روسيا من المسابقة بعد ما بدات الحرب على أوكرانيا، فإسرائيل حتى هي “ما خاصهاش تشارك”.

وكان التلفزيون البلجيكي والإسباني عرضو رسائل كتندد بالجرائم ديال إسرائيل فغزة، فـ نفس الوقت اللي كانت فيه النسخة 69 من مسابقة يوروفيجن منظمة فمدينة بازل السويسرية، واللي شاركات فيها إسرائيل.

التلفزيون البلجيكي عرض شاشة سوداء وسط بث المسابقة، ودارو بيان كيستنكر فيه أفعال إسرائيل فحق الشعب الفلسطيني.

وكان مكتوب فالرسالة: “كنستنكر انتهاكات حقوق الإنسان اللي كديرها إسرائيل، وتدميرها لحرية الصحافة. وبسبب هادشي، غادي نوقفو الصورة شوية. وقفوا إطلاق النار دابا، وقفوا الإبادة الجماعية”، على حسب ما ذكرات الصحافة.

طبعا هادي مطالب للمستقبل لأن دورة هاد السنة دازت السبت اللي فات. هادي مطالب باش يديرو لاسرائيل ما دارو لروسيا. يبعدوهم من المسابقات بحال هادي