الرئيسية > آش واقع > الصبليون فككو عصابة كاتزوج الحراكة المغاربة مع إسبانيات وكاتدير ليهم الوراق
18/01/2020 21:30 آش واقع

الصبليون فككو عصابة كاتزوج الحراكة المغاربة مع إسبانيات وكاتدير ليهم الوراق

الصبليون فككو عصابة كاتزوج الحراكة المغاربة مع إسبانيات وكاتدير ليهم الوراق

عفراء علوي محمدي- كود//

فككات الشرطة الإسبانية، بتنسيق مع “الأنتربول”، اليوم السبت، عصابة مكونة من 30 شخص، متخصصة فعمليات الزواج الأبيض “المارياج بلون”، وكايتزعموها فرنسي وإسباني من أصول مغربية، كاتنشط فمدينتي ففالينسيا وساكَونتو الاسبانيتين.

وحسب مصادر متطابقة، تبين أن هاذ الشبكة كتساعد مجموعة من الحراكة المغاربة على الحصول على بطاقة الإقامة وتنظيم وضعهم القانوني عن طريق الزواج بإسبانيات، وكاتطلب منهم فالمقابل مبلغ كبير ديال الفوس كايتراوح ما بين 8 آلاف أورو و12 ألف أورو.

ولقى الحرس المدني الإسباني عند هاذ العصابة 10 آلاف و 775 أورو وبزاف ديال المجوهرات، وهاذشي بعدما دار 8 ديال العمليات ديال التفتيش فعقارات وشركات تابعة للشبكة فمدينة ساكَونتو الإسبانية.

كذلك استطعات الشرطة الإسبانية إغلاق مكاتب ووكالات تابعة لهاذ العصابة كانت كاتستقبل المهاجرين المغاربة ففالينسيا، وكانت كاتكلف بالتنسيق من أجل البحث عن شريكات “مزرورات” لهؤلاء المهاجرين، وبالتالي إبرام عقود زواج “أبيض”.

وساعدات الشبكة الإجرامية المهاجرين المغاربة فالخروج على إسبانية والإقامة فبلدان أخرى بحال فرنسا وإيطاليا وبلجيكا، عن طريق تزويجهم من نساء من تماك، وهي للي كاتقوم بنقلهم لهاذ الدول عن طريق حافلات تابعة لأحد أعضائها، وللي كانت كاتستعمل من أجل غسل الأموال ونقلها.

موضوعات أخرى