كود سبور//

طامعين الصبليون فاستضافة فينال كأس العالم 2030، ثايقين بريوسهم أنهم يقدرو ينافسو المغرب على هذا الشي من خلال تيران سانتياگو بيرنابيو فالعاصمة الإسبانية مدريد.

وكشفت موقع “Relevo” الإسباني، أن ريال مدريد عندهم هدف يولي تيرانهم سانتياگو بيرنابيو أحسن تيران فالعالم، واستضافة أكبر الأحداث ويدخل أكبر عدد من الفلوس، وهذه هي السياسة ديال رئيسهم فلورنتينو بيريز.

ووضح نفس المصدر، أن طموح فلورنتينو بيريز يتزامن مع مونديال 2030 اللي غايكون فإسبانيا والمغرب والبرتغال، وأن استضافة فينال كأس العالم غايكون أكبر إنجاز بالنسبة لريال مدريد وهاذ الشي علاش ناويين يزيدو من السعة الاستيعابية ديال التيران باش يوصل 85 ألف كرسي.

ويتنافس سانتياگو بيرنابيو الإسباني على استضافة فينال مونديال 2030 مع ملعب الحسن الثاني الكبير المغربي بالدار البيضاء، واللي غايكون أكبر تيران فالعالم بطاقة استيعابية كاتوصل لـ 115 ألف كرسي.