كود سبور//

توقف بيدرو روشا رئيس الاتحاد الإسباني لكرة القدم، على المهام ديالو بعقوبة صدرتها المحكمة الإدارية الرياضية الإسبانية، فهزة جديدة لبيت الاتحاد الإسباني اللي حاط ملف ترشح مشترك مع المغرب وإسبانيا والبرتغال لتنظيم مونديال2030.

وقررت المحكمة الإدارية الرياضية الإسبانية توقيف رئيس اتحاد كرة القدم الإسباني بيدرو روشا مدة عامين، وهي عقوبة له بسبب الطرد التعسفي اللي دار للأمين العام السابق لاتحاد الكورة الإسباني أندريو كامبس.

وكاتجي عقوبة المحكمة الإدارية الرياضية الإسبانية فحق رئيس الاتحاد الإسباني لكرة القدم بيدرو روشا، بعدما طلع رئيس قبل 3 اشهر فالجولة الأولى من الانتخابات، وبعدما كان ناوي يترشح للجولة الثانية من الانتخابات باش يبقى رئيس للاتحاد، فالبوسط اللي خلف فيه الرئيس السابق لويس روبياليس المعتقل على خلفية التحقيق فقضية تحرش جنسي والاشتباه فإبرام صفقات مالية مشبوهة.

ودابا غاتكلف نائب الرئيس ماريا أنجليس برئاسة الاتحاد الإسباني لكرة القدم فبلاصة بيدرو روشا، في انتظار تشكيل مكتب تنفيذي للاتحاد الإسباني.

وحسب جريدة “ماركا” الإسبانية فالقرار ديال معاقبة بيدرو روشا كان صدر منذ مدة، ولكن المحكمة خلات التنفيذ ديالو حتى يسالي  كاس أوروبا اللي توج به المنتخب الإسباني وتسالي الاحتفالات باللقب، مع العلم أن الاتحاد الإسباني جاي تقريبا عام وهو كعيش حالة من عدم الاستقرار فالرئاسة ديالو، وبالضبط من فضيحة “البوسة صحا”، ديال لويس روبياليس الرئيس السابق للاعبة المنتخب الاسباني جينيفر هيرموسو بعد التتويج بكاس العالم للسيدات، وبعدما انفجار فضائح الفساد المالي فالاتحاد.