كود – وكالات//

بسبب الضغط الكبير على الحدود البرية والبحرية، علنات إسبانيا على استثمار فايت 600 ألف يورو باش تدعم مشاريع كتهدف لمساعدة الحراݣة على الرجوع الطوعي لبلدانهم  بالتعاون مع المنظمة الدولية للهجرة ، جزء كبير من هاد الفلوس مخصص للمهاجرين اللي واحلين فالمغرب، واللي كيتعتبر دولة عبور أساسية لآلاف اللاجئين من جنوب الصحراء الكبرى.

الحكومة الإسبانية وافقات فبداية ديسمبر على مساهمة إجمالية كتقدر بـ646,535 يورو باش تنظم الهجرة فإسبانيا، خصوصاً مع التدفق الكبير للمهاجرين على لي بلاج. الهدف من هاد الاستثمار هو تمويل مشاريع كتهدف لمساعدة العودة الطوعية، وإعادة دمج المهاجرين فبلدانهم الأصلية، وتحسين قدرة إسبانيا على إدارة حدودها. الاتفاقية توقعات من طرف وزير الداخلية الإسباني وبالتعاون مع المنظمة الدولية للهجرة، حسب الجريدة الرسمية بتاريخ 6 دجنبر، وغتبقى حتى لنهاية 2026.

الجزء الأكبر من الدعم المالي، تقريبا 350 ألف يورو، غيتم تخصيصو لتعزيز برنامج المساعدة على العودة الطوعية، خصوصاً للمهاجرين اللي عالقين فالمغرب. هاد البرنامج كيساعد على تقديم الدعم الفردي، تقييم الوضعية، الرعاية الطبية، الإقامة المؤقتة والمساعدة المالية، من بعد ما يرجعو لبلدانهم، غيتلقاو 70 منهم دعم إضافي يوصل حتى 1400 يورو للكبار و700 يورو للقاصرين باش يسهل عليهم الاندماج واستعادة الاستقرار الاقتصادي.