كود سبور//

رجع تاني الإعلام الإسباني كايروج بأن تيران سانتياگو برنابيو فمدريد خدا تنظيم فينال مونديال 2030، واخا مازال ما كاين والو من هذا الشي حتى لدابا والأطراف المسؤولة على تنظيم هاد النسخة المغرب وإسبانيا والبرتغال ومعهم الاتحاد الدولي لكرة القدم، مازال ما گلسوش باش يتفقو على برنامج الماتش وكل طرف شحال غادي ياخد من مباراة ونوع المباريات واش افتتاح او فينال او دومي فينال.

وسائل إعلام إسبانية خرجت كاتروج لهذا الشي بناء على معلومات نشرتها جريدة “آس” الإسبانية، وكاتقول ان الأمور حسمت بخصوص فينال مونديال 2030، وان النهائي ديال هاد النسخة غادي يكون فتيران سانتياگو برنابيو فمدريد.

هذا الشي كايبين ان الاسبان خايفين من تيران الحسن الثاني بالدار البيضاء ياخد فينال 2030، بالنظر للإمكانيات العالمية اللي غادي تكون فيه، وهاد الشي اللي خرج الإعلام الاسباني، كايجي بعد أيام قليلة من زيارة دارتها وسائل إعلام دولية للتيران ومنها إسبانية وشافت كيفاش الأشغال فالتيران المغربي كاتطور بسرعة، والمعالم ديال اكبر ملعب بطاقة استعابية ديال حوالي 115 ألف متفرج بدات كاتبان.