كود سبور//

سلط الإعلام الإسباني الأضواء ديالو خلال التوقف الدولي الأخير على المستوى اللي قدمو النجم المغربي براهيم دياز لاعب ريال مدريد مع المنتخب الوطني المغربي، والقيادة ديالو للأسود لتحقيق الرباح على الگابون بـ5 لواحد ومن وراها الفوز على ليسوتو بـ7 لزيزو، ضمن إقصائيات كاس إفريقيا 2025.

جريدة “AS” الإسبانية، هضرت على براهيم دياز، وصفاتو بفيتامين المنتخب المغربي، وهي إشارة منها للإضافة اللي قدمها اللاعب للمنتخب المغربي ملي التحق بالصفوف ديالو، وزاد زكاها فالتوقف الدولي الأخير ملي ماركا 2 اهداف على الگابون الجمعة الماضي، وضرب هاتريك على ليسوتو البارح، وقالت الجريدة الإسبانية أن دياز بهاد النيفو رسل ميساج واضح للإيطالي كارلو أنشيلوتي، بأنه خاص يعطيه فرص اكبر ووقت كثر باش يلعب مع ريال مدريد حيث عندو ما يقول وقادر يعطي الإضافة للفريق ما دام انه ولا عندو دور قياد فتشكيلة المنتخب الوطني المغربي.

حتى جريدة “ماركا” الإسبانية، هضرت على براهيم دياز والمستوى اللي كايقدم مع المنتخب الوطني المغربي، وقالت عليه “حال براهيم مع المنتخب المغربي كايحمق”، واستعرضت الجريدة الحصيلة القوية ديالو مع الأسود، بعدما ضرب هاتريك البارح على ليسوتو، رفع به عدد الاهداف اللي سجل مع المغرب إلى 7 اهداف فـ 8 الماتشات لعبها و 2 تمريرات حاسمة.