كود سبور//

سلطت جريدة “سبور” الكتالونية الإسبانية، الضوء على تراجع مستوى الدولي المغربي سفيان أمرابط، وكيفاش تحول من نجم باغين البارصا والأندية الأوروبية الكبيرة إلى لاعب كايلعب مع فنربخشة التركي، وقالت ان البارصا كانو غايتصيدو فيه كون سناو معه.

ووضحت الجريدة الإسبانية القريبة من برشلونة، وقالت ان سفيان أمرابط كان هدف للمدرب السابق للبرصا تشافي هيرنانديز والمدير الرياضي للنادي ماتيو ألماني فصيف 2023، بعد المستوى اللي بان عليه اللاعب المغربي فكاس العالم 2023، والمساهمة ديالو فوصول المنتخب المغربي لدومي فينال المونديال، وانهم شافو فيه بديل لسيرجيو بوسكيتس فوسط تيران البارصا، ولكن الصفقة ما كملتش بسبب تماطل فيورنتينا الطالياني والجشع ديالهم حيث كانو طامعين فكل اورو فالصفقة وما باغينش يتنازلو على حتى شي حاجة، وهذا الشي خلى صفقة انتقال اللاعب إلى الفريق الإسباني تفشل، واكدت الجريدة ان هذه الصفقة كانت غلط تفاداه تشافي وألماني.

ومشى سفيان امرابط من وراها بعقد إعارة إلى مانشستر يونايتد النگليزي، مقابل 10 مليون أورو لموسم واحد، وملي يسالي الموسم يرجع لفيورنتينا، وقالت “سبور” ان البارصا كان عندهم الزهر حيث ما سناوس مع سفيان أمرابط، ووضحت ان اللاعب واخا ربح ثقة الهولندي اريك تين هاگ المدرب السابق لمانشستر يونايتد النگليزي، ولكن بزاف من الأخطاء الجسيمة خلاتو يگلس فالاحتياط.