گود سبور//

أكد الدولي المغربي إسماعيل الصايباري داكشي اللي نشر جورنال “گود” قبل يومين بخصوص واقعة القلوب اللي دارو من الكونط ديالو فانستغرام لتصاور لاعبين السنغال وهما كايحتافلو بكاس إفريقيا المسحوبة منهم، من طرف لجنة الاستئناف بالكاف واللي منحتها بقوة القانون للمغرب، وقال اللاعب المغربي إن هذاك الشي وقع بالغلط، والسبب في واحد الشخص مسؤول على إدارة حسابات اللاعبين المغاربة والسنغاليين فنفس الوقت على إنستغرام.

وخرج اسماعيل الصايباري صباح اليوم الاربعاء، ونشر سطوري على إنستغرام فيه ميساج المغاربة شرح لهم شنو كاين وطلب منهم المسامحة وقال: “باش نوضح شنو وقع فالأيام اللي دازو، درت جيم لتصويرة فإنستغرام بالغلط وبلاما نرد البال، وكانتفهم غضب شي ناس مني. ولكن هذا الشي ما كاينقصش من حبي وولائي للمغرب، وديما دافعت على بلادي بكل فخر”.

وكمل الصايباري وبقى فيه الحال حيث كاينين شي وحدين تهجمو حتى على عائلتو بالسبان، وقال: “واخا هكداك فوقت الغضب ما خاصش يتعايرو العائلات حيث هما ما عندهم علاقة بهاد الشي”.

ووجه ميساج للمغاربة وقالهم يفكرو دابا فالمستقبل، وقال: “خليونا نركزو دابا على المهم، وهو كأس العالم الجايا، ونبقاو متحدين لتحقيق حلمنا”.