الرئيسية > آش واقع > الصابري في حوار مع “كود” : المستفيد الاكبر من القاسم الانتخابي هوما البيجيدي لي باغيين يستعملوه ذريعة باش يتباكاو على شعبيتهم لي تراجعات وخسارتهم القادمة فالانتخابات
13/10/2020 08:00 آش واقع

الصابري في حوار مع “كود” : المستفيد الاكبر من القاسم الانتخابي هوما البيجيدي لي باغيين يستعملوه ذريعة باش يتباكاو على شعبيتهم لي تراجعات وخسارتهم القادمة فالانتخابات

الصابري في حوار مع “كود” : المستفيد الاكبر من القاسم الانتخابي هوما البيجيدي لي باغيين يستعملوه ذريعة باش يتباكاو على شعبيتهم لي تراجعات وخسارتهم القادمة فالانتخابات

يونس أفطيط- كود///

القاسم الانتخابي، أبرز نقط الخلاف والاختلاف والنقاش قبل انتخابات 2021، كاين أحزاب ماباغياهش، وكاين سياسيين كيشوفو فيه تهديد لمناصبهم، في حين أن جميع من لا حظ لهم في الصعود يقدرو يجيبو مقعد ليهم بسباب القاسم الانتخابي استنادا لجميع الاصوات المعبر عنها سواء صحيحة أو ملغاة.

البرلماني هشام الصابري المنتمي لحزب الاصالة والمعاصرة، مشى فطرح معاكس للجميع، وقال أن الخاسر فهاد العملية ماشي البيجيدي، لأنه ببساطة الرابح الأكبر منها.

نتا كبرلماني واش كتشوف أنك مع القاسم الانتخابي لي عتابراتو البيجيدي غير ديمقراطي، ويلا كنتي ضدو علاش؟

أولا، وقبل ما نبدا خاصنا نوضحوا أن البيجيدي ماشي ضد القاسم الانتخابي ولكنها كتحاول توهم المغاربة أنها ضدو، أما بالنسبة لرأيي ورغم أن البام غايتضرر من القاسم الانتخابي إلا أنني معاه، والقول بأن هاد القاسم الانتخابي غير ديمقراطي ماشي صحيح، لأن الديمقراطية كتتطور ومايمكنش نطوروها ونوصلو للنموذج الديمقراطي المثالي يلا بقينا ديما رافضين نغيرو نموذج فقط لأن واحد الطرف مستفيد منو.

قلتي أن البيجيدي ماشي ضد القاسم الانتخابي، ولكن كتحاول توهم الناس أنها ضدو، كيفاش هادشي؟

تا واحد مايقدر ينكر أن البيجيدي كان حزب قوي، هاد القوة استمدها من التركيز على خطاب المظلومية،وأنه مظلوم وكيحاربوه لأنه حزب اسلامي، وكيحاربوه لأنه ماشي فاسدين وضد الفاسدين،  هادشي ستاعملوا فاش خرجات فضيحة يتيم، وفضيحة الشوباني وبنخلدون، والنجار وعمر بنحماد، ديما كيستعمل خطاب المظلومية، لكن هاد المظلومية مابقاتش كتاكل مع لمغاربة لي فقدو الثقة فالبيجيديين، هادشي علاش قلت أنه البيجيدي ماشي ضد القاسم الانتخابي، ولكن كيبين أنه ضدو، لأنه عارف راسو غايخسر الانتخابات الجاية وملي يخسر الانتخابات يلقى القاسم الانتخابي يعلق عليه خطاب المظلومية ويقول أنه السبب فخسارتو ويعيد اجترار خطاب التماسيح والعفاريت، ديكشي علاش دابا كيبين أنه ضد القاسم الانتهابي، رغم انه المستفيد الاول منو.

يلا كان البيجيدي ماشي هو لي غايخسر من القاسم الانتخابي، شكون هي الاحزاب لي غاتخسر منو، وشكون المستفيد؟

الخاسر الاكبر والوحيد هو البام، هادشي علاش كاين نقاش داخلي صحي بين القيادات وتم اشراك فيه حتى المجلس الوطني، باش نشوفو اشمن قرار نتاخذو، واش مع القاسم الانتخابي لي غادي يخسرنا من عشرين حتى لثلاثين مقعد، ولكن يقدر يزيد  بالدولة للقدام، او نبقاو على القاسم الانتخابي الحالي لاحتساب الاوراق الصحيح فقط، أما بقية الاحزاب فمعندهومش شب خسارة فالقاسم الجديد، ديكشي علاش موافقين عليه.

كاين لي كيعتابر أن وهبي والبام باغيين القاسم الانتخابي حقاش مقادرينش يجيبو عدد مقاعد قريب من المقاعد لي خذاوها فالانتخابات الأخيرة، ما تعليقك؟

ماعرفتش شكون كيصدر هاد الاشاعات، ولكن اكيد انه خايف من البام لدرجة أنه يطلق أكاذيب بحال هادي، لكن نحب نطمنو ان هاد الاشاعات ماغاتنفع فوالو لأننا بالقاسم الانتخابي الجديد أو القديم غنبقاو أقوياء وحنا اكثر المنافسين على المرتبة الاولى قوة، خصوصا أن مهندس الانتخابات ديال 2016 سي محمد الحموتي، هو نفسه مهندس انتخابات 2021 داخل البام، وعارف المعركة القادمة مسبقا وموجد ليها مزيان، وأكيد لي كيطلقوا بحال هاد الاشاعات عارفين ان البام موجد راسو مزيان هادشي علاش كيديرو رقصة الديك المذبوح بهاد الاشاعات الباسلين.

موضوعات أخرى

28/10/2020 13:30

الوزير السابق الأزمي لـ”كود”: مايمكنش تعميم نظام الحماية الاجتماعية على المغاربة بلا إصلاح ضريبي والمساهمة التضامنية مكافياش للتمويل

28/10/2020 12:20

بعد فيديوات لقطع أشجار غابة بوسكورة بشكل ماشي قانوني.. وزارة الفلاحة كتوضح: الغابة خاضعة للحراجة وكنعتنيو بالأشجار المتضررة وكنهيئو فضاءات ترفيهية

28/10/2020 12:00

عيش انهار تسمع خبار.. واحد ضرب اكثر من 190 كلم على حمار من فاس حتى لميدلت هاز معاه 4 كيلو دالحشيش وكميات كبيرة دالكيف -تصاور حصرية

28/10/2020 11:20

كورونا بدات كتحول الاهتمام أكثر للنهوض بالصحة.. دعم القطاع بجهة بني ملال بموارد بشرية إضافية عبر التعاقد مع أطباء وممرضين وقابلات