سهام البارودي- كود//

عرفتي فاش كانبقى نسمع للشيخ سار كايعاود على كيفاش المرا لي جالسة فالدار مرتاحة و كيفاش المرا لي مطيعة لراجلها مرتاحة و كيفاش ماكاتخرجش تتكرفص فحال العيالات الاخرين و الراجل هوا لي مكلف بيها و مهلّي فيها كايجيب ليها لي بغات حتى لعندها و الله الى كايجيني هوا براسو ماكرهش يكون ديك المرا في حياة اخرى و يسيفط ليه الله شي واحد يبرعو و هوا جالس فالدار كايصور البودكاستات!
حيت السيد كايقرب يسيلو ليه الريوگ و هوا كايعاود على هاد الحياة المثالية ! واش عرفتي كيفاش كاتعيش المرا فالمخيلة ديال الشيخ سار ؟! راه قاليك كاتعيش أميرة في بيت زوجها ! كلشي كايجيها حتى لعند رجليها ! خلاها عادل إمام فمسرحية الزعيم ” عايز فاكهة ياكل فاكهة، عايز مانگة ياكل مانگة، عايز لحمة ياكل لحمة….” … المرا فمخيلة الشيخ سار كاتعيش احسن من اميرات ديزني ! كانقول فمخيلة الشيخ سار حيت مازال ماكايناش شي أميرة كاتعيش فجوج بيوت و كوزينة فسلا !

و فالواقع كاتلقى العيالات لي جالسات فالديور نسبة كبيرة فيهم كارهة هاد الوضعية و طلع ليها الزلط فالكر د الكر ديالها هادشي علاش مع بان اليوتوب خرجو بزاف د ربّات البيوت بالكولون كايعرضو علينا تراميهم لي رباوهم بالمرقة و السداري فاش كانو اميرات في بيت ازواجهن ! الواقع ماكايشبهش بتاتا لقصص كليلة و الشيخ سار ! الواقع فيه بزاف د العيالات جالسات فالدار مفقوصات، كاتلقا عندها الراجل مزلوط و لا ماباغيش يخدم و لا سقرام و لا ماكايقيّمش و لا ماكايغسلش و حتى فاش كايكون الراجل مزيان بزاف كايحسو براسهم ماعندهمش كلمة فالدار ماعندهمش شخصية و ماعندها مادّير ليه ، صابرة حيت جيسطومون ماعندهاش الاستقلالية المادية لي تخليها تعيش حياة احسن ! ماعندهاش البديل ! و هادشي علاش الاغلبية ديال ربّات البيوت كايدفعو بناتهم يقراو و يخدمو و يكونو عندهم الفلوس ديالهم باش مايعاودوش يعيشو التكرفيص لي عاشو هوما !

راه المغربيات سنين و منين و هوما جالسات فالدار آش نتجو لينا ؟! والو غا القصص الدرامية ديال فلانة طلقها فلان و خرجات للزنقة ! فلانة جاب عليها الضرّة ! فلانة كايضربها و ماقادش تفارق معاه … و اصلا هادشي ديال اميرة في بيت زوجها و الراجل كايجيب ليها لي بغات هادشي خاص يگولو شي خليجي شي سعودي شي كويتي هادوك هوما لي مهليين فعيالاتهم بزَاف راه شفنا القطريات فكاس العالم كي بوگوصات و مهليات و باين فيهم الخير د الازواج ديالهم كلشي معاود القنانف كلشي هاز الايفونات كلشي مركب الرموش، تا لاقالو أميرة راه بصّح اميرة و تالادواو على القوامة راه بصح عندهم القوامة، السعودي غي كاياكل شي كبسة بنينة من يد الخدامة الفيليبينية كايقول لمولات الدار ” الله يعطيك الصحة ا ابشري” و كايتم جايب ليها شي ايفون ربعطاش مغلّف بالذهب مع السماعات ديالو مع الشارجور تاهوا مغلفين بالذهب ! الدار كبيرة و كليماتيزي و الخدامات فيليبينيات و الشيفور بنغالي و العطل فالمالديڤ و فرانسا و لندن و عمليات التجميل فلبنان …

هادو تا لا دواو على القوامة و بغاو يديو الورث كامل غا يديوه هههههههه جات معاهم ! حنا بنادم عندنا مقاتل مع الوقت كايشد السميگ و باغي يجلسها فالدار و يحكم فيها و تطيعو و كلمتو هي لي تكون ! و غالبا فاللخر كانلقاوها كاتلوّز فشي ڤيديو فيوتوب و هي كاتورينا كيفاش نشطبو الزربية و هوا هاز الكاميرا كايقوليها زيدي زيدي تجانبي شوية !