عثمان الشرقي ـ ݣود//

“فالأعراس، فالمواسم، ولا حتى وسط الديور، والسهرات الشّيخات كيتجمعو عليهم الرجال والعيالات، كل واحد جاي يفاجي همو، وغير كتبدا الشّيخة تغني، كتولي السهرة بحال شي ݣلسة ديال العلاج الجماعي وتصريف الطاقة السلبية الطايح فيها كتر من النايض”.

فالمغرب مكتحلاش السهرة أو مجمع موسيقي بلا الشيخات أو”طبيبات”، كيف ما كيسميهم بعض المعجبين… طبيبات بلا براوات، بلا دوا، بلا اوردونونص فقط غير بالموزون كيسوانيو الݣلب ويقادو المزاج غير بهاد السلاح السحري “الموزون” ممكن المعاق يتحرك ويضحك، ممكن لي طالع له طانسيو ينزل، وممكن الشيباني يتݣعد ويرجع بحالا فعمرو ستاش العام، فسبحان من يحيي العظام وهي رميم.

الشّيخة… امرأة وݣادة

الشيخة ماشي غا كتشطح، ولكن فالحقيقة، هي فنانة، وشاعرة  عندها قدرة على لكلاش والمديح ديك ساعة نيت وفوق إيقاع موسيقي فين يبان شي ايمينيم، الشيخة رياضية عندها لياقة بدنية عالية  وكوتش ديال لايروبيك فصعيب أنها تبقا تشطح لمدة ديال ساعة متواصلة أو سهرة، فراه ايلا مكانتش عندها جهد وصحة وتناسق دهني عضلي باش تشطح مع الموسيقى وصحابتها فنفس الإيقاع والحركات أما فالمجمع د العيالات كيغنيو على مواضيع لي من السمطة لتحت تيعالجو مواضيع الحياة الحميمية بالغنا والضحك، كلشي فرحان كلشي ناشط فجو كيعكس حب المغاربة للنشاط بلا أي مركب نقص .

الشيخة محرك اقتصادي

الشيخة، عندها دور اقتصادي كبير: حضورها فالأعراس والمواسم كيدور الحركة. كيجيو الناس من كل بلاصة وكيصرفو على اللباس، الأكل، النقل، والكرا. الشيخة كتجر معاها  الماسقية، الصنايعية، لقايجية الخ السهرة كتولي بحال سوق صغير كايدور عمر، هنا كتولي الشيخة سبب مباشر فخلق فرص شغل وتنشيط الحركة التجارية.

الشيخة مؤثرة

دابا مع اليوتوب والتيك توك، رجعات الشّيخة مؤثرة. عندها معجبين هالي كيبغي هدى ها لي كيموت على فاتي دوكا هالي من اتباع الشيخة الروسية كل واحد واشنو كيشجع بحال لعابة ديال الكرة، الشيخات كيديرو انتقالات مابين الفرق الموسيقية كيخدمو بعقود حرة وكاين الجمهور لي تيعجبو الفنان غا على قبل شيخاتو”بحال لي كيشجع الهلال على قبل رونالدو”.

الشيخة طبيبة

فاوروبا وفرنسا بالخصوص كيدخلو الكلونات والماسقية للسبيطارات باش يفرحو المرضى، فالمغرب نقدرو ندمجو التراث الشعبي بحال الشيخات فهاد المجال. العروض تكون صغيرة، مبرمجة فالأوقات المناسبة، واختيارية للمرضى اللي بغاو يستافدو خصوصاً الأطفال والمسنين. هاد الاقتراح غادي يخلي سبيطار ما يكونش غير مكان للعلاج الطبي، ولكن حتى مكان للفرحة والراحة النفسية، ويعاون على تخفيف التوتر والألم، ويقرب المرضى من الأطر الطبية وينقصو حتى ستريس عليهم وعلاش لا حتى فقطاع التعليم المادة ديال الرقص الشعبي دخل فالمدارس الرائدة.