كود سبور//
داز الدولي المغربي محمد الشيبي لاعب بيراميدز المصري عند لجنة الانضباط فالاتحاد المصري لكرة القدم، اللي فتحت معه تحقيق بعدما دارو به الأهلي المصري شكاية فالاتحاد المصري ديال الكرة حيث لجأ للسلطات المصرية ملي تعدا عليه حسين الشحات لاعب الأهلي، والشيبي ملي داز عند هاد اللجنة قالهم: “دابا إلى ضربت الشحات واش غاتوقفوني غير 2 ماتشات وغرامة كيفما درتو مع الشحات ملي تعدا عليا؟”.
وكشفت جريدة الوطن المصرية نقلا عن مصدر من داخل لجنة الانضباط باتحاد الكرة المصري، أن الشيبي خلال التحقيق معه، قال إنه كان كيتسنا يتعطاه حقو من اتحاد الكرة المصري، ولكن تفاجأ بتوقيف الشحات 2 ماتشات وغرامة 20 ألف جنيه، بعدما صرفقو قدام كلشي وسبو، وسول اللجنة وقالهم: “دابا أنا إذا تعديت على الشحات فالماتش الجاي بين بيراميدز والأهلي غنتعاقب بنفس العقوبة اللي تعاقب بها لاعب الأهلي؟”.
وكمل نفس المصدر ووضح أن محمد الشيبي أكد للجنة أنه ما مشاش للمحاكم المدنية باش ياخد حقو ولكن مشى للنيابة العامة، وهي اللي شافت شنو دار الشحات وحولاتو لقضية فالمحكمة، وأكد لهم أنه فايت وتعرض للضرب من شي لاعبين ديال الأهلي وما خداش حقو، وداكشي على قرر يتحرك فواقعة حسين الشحات.
وكمل الشيبي وقال للجنة: “تسنيت يخرج الشحات فمؤتمر صحافي ويقدم اعتذار أو يدير فيديو، ولكن ما دارش هذا الشي ومن الفوق باغي يتصالح وما يشوفو حد بعدما ضربني وسبني قدام كلشي، وملي تحركت باش ناخد حقي بدا كيحاول يتصالح مرة اخرى”.
