گود سبور//

تحكم على زعيم عصابة تهجمت على دار گول الطاليان جانلويجي دوناروما ومراتو فاش كانت خطيبتو وكانت حاملة، فالعاصمة الفرنسية باريس، (تحكم) بالحبس الطويل البارح الجمعة هو وشفار آخر معه.

وحكمت المحكمة فباريس على المخطط لهاد عملية الهجوم على دار دوناروما الشفرة فيوليوز 2023، بالحبس 9 سنين، الاسم ديالو إلياس خربوش وعندو 21 عام، وغادي يخلص غرامة مالية 80 ألف اورو، وشريكو الاخر والاسم ديالو مختار دي تحكم عليه بالحبس 5 سنين، عام منها موقوف التنفيذ وغادي يكون خاضع فيه للمراقبة، وبالمقابل خدا المتهم الثالث خيان ام البراءة، راه كان مشتبه به فالتخطيط لهاد العملية ديال الشفرة من الحبس فين كان مشدود على جريمة اخرى.

الواقعة كانت شهر يوليوز 2023، ملي دخلت عصابة مكونة من 7 أشخاص على شقة ديال دوناروما بالليل، وملي فاق الگول السابق لباريس سان جرمان والحالي لمانشستر سيتي هو وخطيبتو لقاو ريوسهم مكتفين، وضربوه هو بزاف، وخنقوها هي بكابل، وتسبب هذا الشي فإجهاض الجنين اللي كانت حاملة به خطيبة دوناروما فهذاك الوقت اللي هي مراتو دابا.

وقدرو يشفرو هاد العصابة فلوس وليبيجو وساعات وسيكان غاليين، واصلين فالمجموعة لأكثر من مليون اورو، ويالاه تشدو منهم 2 شفارة والبقية ما تعرفوش.