گود سبور//

تشد بزاف ديال بنادم البارح السبت فالعاصمة الفرنسية باريس، بسبب أحداث شغب وقعت، بالتزامن مع فينال دوري أبطال أوروبا اللي كان ملعوب فعاصمة المجر بودابست، واللي سالا بتتويج باريس سان جرمان الفرنسي باللقب بعدما ربح أرسنال النگليزي بالبينالتيات.

وكشف وزير الداخلية الفرنسي لوران نونيز، أن البوليس ففرنسا شدو حوالي 400 واحد، فيها 283 غير فباريس بوحدها، وحجزو على عدد من لفلام ولعب د العافية، وتفرشخ باركينگ الطوبيسات فشارع حدا الشانزيليزي وسط باريس، وتوعتو عناصر 7 عناصر من البوليس واحد منهم حالتو خطيرة.

https://x.com/i/status/2060878219985756571

أحداث الشغب وصلت حتى للممتلكات الخاصة وتهرسو شي 6 الطوموبيلات، وخربو باتيسري وريسطو كاينين حدا تيران بارك دي برانس ديال باريس سان جيرمان، فين تجمعت ما بين 4000 و5000 واحد وبداو كايشيرو على البوليس، فالوقت اللي شي 150 واحد بغاو يدخلو للتيران والبوليس جراو عليهم.

السلطات الفرنسية خصصت البارح بهاد المناسبة 22 ألف بوليسي نشرتهم فگاع فرنسا، من بينهم 8 آلاف بوليسي غير فباريس بوحدها، تحسبا لاعمال شغب حيث نفس الشي وقع العام اللي فات ملي باريس سان جرمان ربحو دوري أبطال أوروبا.