محمد سقراط-كود///

هاد اليوماين وزارة الأوقاف عطات صفقة ديال بناء جامع كبير يتزاد على عشرات الجوامع في هاد المدينة البئيسة، هاد الصفقة واصلة ل13 مليار سنتيم، ومع ذلك ماخرج تاواحد وقال مابغيناش الجوامع بغينا المدارس، على غرار هاد الموصة النضالية الجديدة ديال مابغيناش التيرانات بغينا السبيطارات، علاش حتى واحد مكيهدر على تكلفة الجوامع وتكلفة التدين في المغرب عموما، شحال كيتقام علينا التدين المغربي المعتدل المالكي الصوفي الوسطي السمح، من واحد الناحية كدولة إلى مصرفتيش على النسخة ديالك من الإسلام، غادي يجيو وحدين خريين عندهم بزاف ديال الفلوس ويصرفوا على النسخة ديالهم من الإسلام وسط بلادك، ويبدلوا ليك تدين شعب على قدو، وهادشي وقع وشفناه مع الصحوة الإسلامية، ودوك الكتيبات ديال يهدى ولا يباع لي كيجيو من السعودية، ومع الكاسيط ديال الشيخ كشك، وعمرو خالد  أول كراش عند حجابي عفتي،  والنتيجة عيالات بالبرقع والنقاب  ورجال باللباس الأفغاني حتى تحولوا أحياء هامشية الى شبه طورابورا.

التدين واحد الحاجة شخصية بينك وبين راسك ولكن فاش كتكون الدولة هي لي متدينة بحال المغرب، فراه كيولي هاد التدين كيتقام غالي على المغاربة بلا مايقدرو حتى يناقشوا هادشي، عمرك تشوف شي حد حاط صورة مسجد الحسن التاني وكيتحسر على الفلوس لي ضاعوا فيه، كون تم جمعهم وتوفيرهم بنفس الطريقة وإستثمارهم في برنامج تعليمي متطور، كون راه حنا كنافسو دابا تايوان في صناعة الإلكترونيات، أو نافسوا غير ماليزيا بما أنها أقرب لينا نوعا ما من ناحية الساكنة والوقت ديال الإستقلال والبدية المتعثرة، هنا في فاس بالخصوص كاين أحياء على قدها كتعاني من خصاص كبير في المدارس، ولاد الطيب كمثال راه ولادهم كيعانيو في التنقل اليومي بحال الى ساكنين في إملشيل وهوما راه جنب فاس، هاد مية وتلاتين مليون دالدرهم راه تبني ليهم مدرسة تم، ومع ذلك ماغادي يقدر يقول تاواحد اللهم إن هذا منكر راه عندنا الجوامع في الكفاية ومكيعمروش غير خاويين.

فين ساكن كاين تلاتة ديال الجوامع غير حداي اجوج أونفاص بعضياتهم وواحد فيهم كبير بزاف، وفي المنطقة ككل كاين شي خمسة دالجوامع كبار، وكيعمروا غير في الجمعة والأعياد ورمضان، والأيام العادية ديما خاويين، بينما المدارس لي كيعمروا يوميا قلال وأغلب التلاميذ كيضرب طوالة ديال الطريق باش يوصل لأقرب مدرسة، بالإظافة إلى أن المدارس العمومية هي الخيار الأخير للساكنة، حيت في الوقت لي مكاينة حتى مدرسة عمومية في الحي بالظبط لي ساكن فيه كاين ربعة دالمدارس خصوصية من أكبرهم في فاس، وطبعا مكاين حتى مستوصف عمومي كاين غير المصحات الخاصة، الخاجة الوحيدة لي عمومية هنا هي الجامع وراه منو عرام، إيوا واش مكتفكرش الدولة تقاد الميزان شوية، راه هاد قوة الجوامع وقلة المدارس ماغادا بالبلاد فين، واباركا من الجوامع بغينا المدارس والسبيطارات.