كود سبور//

اكد التونسي معين الشعباني مدرب نهضة بركان ان الفريق كامل موتيفي وواجد باش يلعب لالي ديال دومي فينال كاس الكونفدرالية الأفريقية ضد الزمالك، وقال بلي الفريق المغربي قادر يربح لاكوب واخا النهائي الصعيب، وان الفينال فيه الذهاب والاياب داكشي علاش نتيجة لالي ما شي حاسمة.

وهضر معين الشعباني مدرب نهضة بركان خلال الندوة الصحافية اللي كتسبق ذهاب نهائي كاس الكونفدرالية بين الفريق المغربي والزمالك المصري، وقال: “كلشي موتيفي وواجد للفينال، واي واحد لا مدرب ولا لاعب ولا مسؤول غايبغي يلعب نهائي، وهاد فرصة كبيرة باش نربحو هاد الفينال”.

وكمل معين الشعباني ووضح: “الباركور ديال نهضة بركان والزمالك كان طويل والفراقي بجوح عياو باش وصلو للفينال، والمهم عندنا دابا هو نكون حاضرين ومستعدين فالـ90 دقيقة”.

وبخصوص التجربة ديالو مع الكورة المصرية اللي تقدر تعطيه امتياز ضد الزمالك، قال الشعباني: “كنت مدرب فالبطولة المصرية، وهي بطولة ممتازة وفيها لاعبين ممتازين، وكيفما أنا كنعرف الكورة المصرية، راه المصريين كيعرفوني، وكلشي مكشوف وحقيقة التيران حاجة اخرى وما كاين حتى شي ماتش كيشبه للاخر”.

وبالنسبة لنتيجة ماتش لالي والقيمة ديالها قال الشعباني: “ماتش الروتور يقدر يكون فيه ضغط كبير علينا وحنا كانتمناو ان نتيجة الذهاب تكون لمصلحتنا بنتيجة مريحة ولكن هذا الشي ما يضمنش لك تربح الكاس، حيث الفينال كيتلعب على 2 ماتشات واحد فبركان وواحد فالقاهرة، ونهضة بركان فريق متعود يلعب الماتشات الصعاب ومتعود على الضغط ديال الجمهور”.