كود سبور//

اعتبر التونسي معين الشعباني مدرب نهضة بركان أن نتيجة الرباح اللي حقق الفريق على الزمالك المصري فلالي ديال فينال كأس الكونفدرالية الأفريقية هي مزيانة للفراقي بجوج ولكن كتبقى ملغومة، وبارك للاعبين ديالو حيث دارو ماتش مزيان ضد الفريق المصري.

وهضر معين الشعباني مدرب نهضة بركان من بعدما سالا الماتش ضد الزمالك، وقال: “كنا عارفين أن الماتش ما غايكونش ساهل بين الفريقين، وهذا اللي وقع، والماتش كان فالمستوى، ودابا سالا الشوط الأول فبركان، ومازال الشوط الثاني فمصر”.

وكمل معين الشعباني وقال: “كنا قادرين نماركيو كثر خصوصا فالشوط الأول والفريق ديالي دار ماتش مزيان قدام فريق كبير بحال الزمالك وكنبارك لهم، والرباح بنتيجة 2 لواحد هي مزيانة للفريقين، وكتبقى ملغومة والحسم غايكون فالقاهرة”.