كود -وكالات//

شركة القْمر الوطنية البلجيكية مازال كتقلب على اللي ربح 6 دالمليون يورو فـسحب “إكسترا لوتو” ديال ليلة 31 دجنبر 2025، ولكن حتى لدابا ما بان حتى شي واحد يطالب بالجائزة ديالو.

الأرقام اللي خرجات فداك السحب هي: 5، 7، 13، 19، 29، 39، وزيد عليهم الرقم الإضافي 15، واللي خلات غير تيكي واحد هو اللي ربح الفلوس كاملة، وتبيّن من بعد الفحص باللي هاد التكيت تقطعات نهار 30 دجنبر 2025  فمدينة بلانكنبيرج، ولكن بقات هوية مولها مجهولة.

الشركة دارت نداء وطلبات من جميع الناس اللي شاركو فداك السحب، خصوصاً اللي شراو من نفس المدينة، يعاودو يقلبو مزيان فتيكياتهم، حيث الفرصة مازال كاينة ولكن الوقت مبقاش.

قانونياً، كاينة مهلة ديال 20 أسبوع باش الفائز يبان ويطالب بالجائزة، ودابا راه دازو تقريباً 16 أسبوع، يعني باقي غير شي 4 سيمانات قبل ما تسالي المهلة نهائياً.

المسؤولين قالو باللي هاد الحالات قليلة، ولكن إلا ما بانش الفائز، الفلوس كتمشي لأعمال خيرية ولا كترجع تدخل فالسحوبات الجاية، وزادو شددو باللي التيكيت الأصلية هي الدليل الوحيد، وأي واحد ضيعها كيضيع معاه الربح.