كود سبور//

نايضة فاتحاد طنجة وكيبان أن الفريق غادي للحيط بسبب الأزمة المالية اللي كيعيش، وخرج رئيس النادي محمد الشرقاوي يكشف شنو واقع، وعلن أنه كيقلب على شي رئيس يشد اتحاد طنجة ويعاونو بالخبرة اللي عندو حيث صافي عيا.

وتحدث محمد الشرقاوي فتصريح للصفحة الرسمية ديال اتحاد طنجة وقال: “ملي جيت لاتحاد طنجة لقيت كاينة الأزمة وجيت نحلها، وملي دخلت لاتحاد طنجة كانت عندنا 0 درهم، و8 المليار كريدي وكلشي كيتسال وكثر من 200 مليون فالنزاعات وباقي سيمانة ويتسدو الانتدابات وممنوع على اتحاد طنجة يفتح حساب فالأبناك ديال طنجة كاملين، استشرت مع جهات معنية قالو ليا عندك الضو الأخضر اشتغل وفظرف سيمانة جبنا 11 لعاب ومدرب، وغير لاعب واحد إذا بغيتو تسني معه خاصك تضرب شهر ولا شهر ونص وانت كتفاهم معه حنا جبنا 11 لعاب ومدرب فسيمانة وماشي حنا راه أنا وكنت بوحدي كنكافح وحتى حد ما بغا يدخل معايا للمكتب وعيت ما نرغب ونزاوك”.

وكشف الشرقاوي: “جمعت واحد القدر من الفلوس، أنا اللي جمعتو حتى حد ما عطاه ليا وخلصت النزاعات والصاليرات ديال شهر 12 وكان شهر 11 و12 و1، ومن بعد بدينا كنديرو الانتدابات اللي الأثمنة ديالهم كانت ضئيلة بزاف، بحال متولي بدينا معه بـ30 مليون، والمودن بين 30 و35 و40 مليون بحال هاكدا، ولكن فين مشاو لينا الفلوس؟.. الفلوس مشاو لينا فالبريمات والصاليرات وكنا كنعطيو بريمات خياليين واللي كان كيقول بللي البريمات كانو كيتعطاو من بعض الغيورين، راه هداكشي اللي كانو كيعطيو الغيورين كان كيتعطى فوق البريمات اللي كنعطيو حنا اللي هي 30 ألف درهم ولا 20 ألف درهم والغيورين كيجيو يعطيو 30 ألف درهم اخرى”.

وكمل الشرقاوي: “وما خاصناش نغلطو الرأي العام راه من 29 نقطة باش تصوفي نعطيك 6 المليار وعملها والله ما تعملها ودابا واللينا حنا شفارا والمسؤولية والمحاسبة.. حنا راه عندنا كلشي مسجل بالشيكات والبنك والمصاريف فين دخلت وخرجت والتقرير المالي والكونطابل عندنا كلشي معدل ما مخبين ما شافرين بالعكس حنا عندنا الزيادة وحطناها من رزق ولادنا فالفريق وملي حطينا حساب البنك نضتو كتستهزؤ منها وتصيفطو لينا درهم وهادي راه عملتها دورتموند اللي فأوروبا عملتها الرجاء العام اللي فات الناس عملت الصينية وجمعت الفلوس عن طريق البنك حنا غير شدينا الفريق بديتو تحفرو ودرتو للمسائل المالية، واش كاين شي واحد غيشفر ناقص 8 الملايير.

محمد الشرقاوي رئيس اتحاد طنجة تغلب وما بقاش باغي يترأس النادي وأكد: “أنا دابا كنقلب على رئيس درت على منعشين عقاريين هضرت مع بزاف الناس فاعلين اقتصاديين سافرت على برا، أنا كنفتش على رئيس يجي يترأس اتحاد طنجة وأنا نعاونو ما كاينش مشكل بالخبرة اللي خذيت فهاد المدة الزمنية القصيرة اللي ترأست فيها النادي”.