احمد الطيب گود سبور الرباط//

كيتهرب محمد الشرقاوي رئيس اتحاد طنجة من المسؤولية على الوضع الصعب والكارثي اللي كايعيش فيه النادي فالمرحلة التسييرية ديالو، بعدما كان عطى وعود فاش طلع للرئاسة عام 2023، باش يرجع الفريق للقوة ديالو وينافس على البطولة الاحترافية.

الشرقاوي رئيس اتحاد طنجة، ولى باغي يتنصل من المسؤولية، بعدما بان ان الماتش كبر عليه وانه ماشي قد المسؤولية والثقة اللي داروها فيه طنجاوا، وتبين انه فشل فالتسيير د النادي والفريق معه ولى كل موسم كايتخبط فالمشاكل التسييرية والمادية، لدرجة ان اللاعبين دوزو الموسم الماضي كل إضرابات وما كايتدربوش وقبل كل ماتش كايهددو انهم ما غايلعبوش، الأمر كان غايتسبب فنزول اتحاد طنجة إلى القسم الثاني.

هاد الشي كامل ومازال الشرقاوي متمسك برئاسة اتحاد طنجة، ومن الفوق تسبب فأن الفريق يبدا الاستعدادات للموسم المقبل معطل بزاف، حيث اللاعبين رفضو يتدربو حتى يديرو معهم المسيرين د النادي وعلى راسهم لبريزيدو الشرقاوي حل بخصوص المستحقات اللي كايتسالوها، لولا تدخل الشركة الرياضية وفعاليات مدينة طنجة مؤخرا اللي تحملو المسؤولية ولقاو حل مع اللاعبين، باش دخلو للمعسكر التدريبي استعدادا للجولة الاولى من البطولة الاحترافية.

وبالمقابل فرئيس النادي اللي جابو يوسف بنجلون٬ اخطبوط اخر فهاد لمدينة٬ وعطاه التسيير بعد ما قدمو وعود للسلطات يخرجو من المنافسة على البقاء فكل موسم، إلى المنافسة على البطولة ويكرر الإنجاز اللي حقق اتحاد طنجة الفوز باللقب كيف دارو فعام 2018، لكن الشرقاوي غير ما ما كايزيد يقزم فالنادي وكايخلق فمشاكل والعدوات داخل الـIRT واللي النادي ما ناقصهاش، بحال الخلاف الأخير ديالو مع الشركة الرياضية على التقرير المالي للجمع العام، لدرجة ان الطنجاويين كايتعجبو كيفاش أن الفريق غارق مشاكل مالية وتسييرية، والرئيس اللي معولين عليه يكون كابابل ومرن وديبلوماسي ويوقف ويوحد فعاليات طنجة ويجمعهم لحل المشاكل ويجيب لفلوس ويخلص النزاعات واللاعبين اللي كايتسالو، ويتعاون مع گاع طنجاوا باش الفريق يزيد يخرج من الأزمة، هو اللي گالس يزيد يخلق فالمشاكل ويقسم فالنادي اللي المستقبل ديالو حاليا مجهول معه. دابا راه فالصبليون كيسمسر لصحابو وما مسوقش للنادي ولا لاستعداداتو للموسم الجديد