كود ـ سبور //

علنات اللجنة الوطنية الأولمبية المغربية على المشاركة الرسمية ديال المغرب فالألعاب الأولمبية الشتوية ميلانو–كورتينا 2026، اللي غتكون فإيطاليا ما بين 6 و22 فبراير، هاد المشاركة جات بعد ما منح الاتحاد الدولي للتزلج الحصة المخصصة للمغرب، وبناءً على اللائحة اللي صادقات عليها الجامعة الملكية المغربية للتزلج والرياضات الجبلية، وبهذا تسجلات البعثة المغربية رسمياً عند اللجنة المنظمة.

وغيمثل المغرب فهاد الدورة جوج رياضيين.فرياضة التزلج الألبي، غيشارك بيترو ترانكينا فمسابقتي التعرج والتعرج العملاق، بينما فالتزلج الريفي على الثلج غيخوض عبد الرحيم كميسة سباق 10 كيلومترات بأسلوب حر، فمحاولة لتأكيد الحضور المغربي فرياضات الشتا.

المنافسات ديال البعثة المغربية غتجرى فمناطق جبلية مختلفة بشمال إيطاليا، بحيث غتحتضن مدينة بورميو منافسات التزلج الألبي، بينما مدينة بريداتسو غتكون مسرحاً لمنافسات التزلج الريفي على الثلج، ضمن تنظيم موزع على أكثر من موقع.

وفنفس السياق، كيبقى المغرب بلد الجبال والثلوج، خصوصاً فالأطلس المتوسط والأطلس الكبير، اللي كتعرف تساقطات ثلجية مهمة، هاد المؤهلات كتفتح الباب قدّام تطوير رياضات الشتا إلا دارات أندية متخصصة، وتكوين الأطر، وتشجيع شباب المناطق الجبلية، الشي اللي يقدر يعزز الحضور المغربي مستقبلاً وحتى يفتح النقاش على تنظيم تظاهرات شتوية قارية أو دولية.