كود الرباط//

عرفات وضعية السدود بالمغرب تحسناً نسبياً خلال الأيام الأخيرة، بعدما طلعات التساقطات المطرية الأخيرة من نسبة ملء حقينات السدود إلى 33,13%، مقابل حوالي 31% قبل هاد الأمطار، أي بزيادة تقارب 2 نقط مئوية في ظرف زمني قصير.

وحسب المعطيات الرسمية للحالة اليومية للسدود، فإن الحجم الحالي للمياه المخزنة بلغ 5.553,34 مليون متر مكعب، وهو رقم كيعكس انتعاش محدود ولكن مهم، خصوصاً بعد شهور طويلة من الجفاف وتراجع الواردات المائية.

هاد التحسّن همّ بالخصوص عدد من الأحواض المائية اللي عرفات تساقطات مهمة، وساهم فرفع منسوب عدد من السدود الكبرى، سواء المخصصة للماء الصالح للشرب أو للسقي الفلاحي، اللي كان متأثر بشكل كبير خلال الشهور الماضية.

ورغم هاد الارتفاع، كيبقى مستوى ملء السدود دون المعدلات العادية، وحتى دون مستويات سنوات مطرية متوسطة، الشي اللي كيأكد أن وضعية الإجهاد المائي مازال قائمة، وأن المغرب محتاج مواصلة سياسة ترشيد الاستهلاك، وتسريع مشاريع تحلية المياه، وربط الأحواض، وتثمين كل قطرة ماء.

بالمقابل، كتعطي هاد التساقطات شوية نفس للفلاحة وللتزويد بالماء، وكتبيّن باللي أي تساقطات، ولو محدودة، ولات كتلعب دور حاسم فالتوازن المائي للبلاد.