كود: كازا//

ففاجعة جديدة هزات منطقة الوازيس فكازا صباح اليوم الثلاثاء 16 دجنبر 2025، من بعد ما انهار سور ديال مؤسسة تعليمية خاصة بسبب الشتا القوية اللي عرفتها المدينة من ليلة البارح. الحادث أدى إلى أن عساس في واحد الحضانة يفارق الحياة فالحين، وتصاب مؤطرة بجروح متفاوتة الخطورة.

وحسب المعطيات المتوفرة، فالتساقطات المطرية الغزيرة كانت السبب الرئيسي فهاد الانهيار، بحيث طاح السور مباشرة على الحارس والمؤطرة اللي كانت متواجدة فالمكان. الحارس مات فبلاصتو، بينما المؤطرة تصابات فالرجل ديالها.

وفور وقوع الحادث، تدخلات عناصر الوقاية المدنية، تنقلات المريية المصابة للمستشفى باش تتلقى الإسعافات الضرورية، فيما تم نقل جثة الحارس لمستودع الأموات.

ومن جهتها، فتحات المصالح الأمنية تحقيق فهاد الواقعة المؤلمة، باش تعرف شنو وقع بالضبط، واش كان شي إهمال ولا مشاكل فالبنية التحتية ديال المؤسسة، خصوصا فهاد الظروف المناخية الصعيبة.

وتجي هاد الفاجعة فواحد الوقت اللي كانت فيه عمدة الدار البيضاء، نبيلة الرميلي، دارت نداء لساكنة العاصمة الاقتصادية وأصحاب المحلات التجارية، باش ياخدو الحيطة والحذر بسبب التقلبات الجوية المتوقعة، والزخات الرعدية القوية.

العمدة، وعبر تدوينة فالصفحة الرسمية ديالها على فيسبوك، دارت واحد السلسلة ديال الإرشادات البارح الاثنين، ودعات فيها للحذر وحماية الأرواح والممتلكات، ولكن رغم هاد التحذيرات، الشتا عاودت تكشف باللي كاين خلل كبير فمراقبة البنايات والأسوار، خصوصا فالمؤسسات اللي كيتردد عليها الناس يوميا.

فاجعة الوازيس رجعات تطرح من جديد سؤال المسؤولية والمحاسبة، واش غادي يبقى المواطن كيخلص ثمن الإهمال مع كل شتوة قوية..؟ ولا هاد المرة غادي يكون تحقيق حقيقي وترتيب للجزاءات..؟