كود ـ شفشاون//

الشتا المجهدة اللي طاحت فالأيام الأخيرة على ساحل إقليم شفشاون، خصوصا فجماعتي (أمتار وبني بوزرة)، عرات مرة اخرى على الهشاشة الكبيرة اللي كتعاني منها البنية التحتية فالمنطقة.

السيول القوية لي عرفاتها المنطقة سدات قناطر ومسالك طرقية وخلات عدد من الدواوير معزولة، وخلفات خسائر مادية عند الساكنة.

حسب مصادر محلية، السيول فتحت مجاري وديان ما كانتش معروفة من قبل، وولات تشكّل خطر حقيقي على منازل المواطنين، خصوصا فدوار اعرقوب، فين دخلات المياه لبعض الأحياء السكنية وخلات الرعب وسط الساكنة، وزاد الوضع تعقد من بعد ما تسدات قنطرة فالطريق الوطنية رقم 16، الشي اللي خلا الأتربة تتراكم وتحول مجرى السيول نحو منازل مجاورة، وكل هاد الشي وقع فغياب المراقبة والتدخل من الجهات المعنية.

ومازال الطريق اللي كتوصل لقرية الصيادين بدوار اعرقوب مقطوعة لحد الساعة، وهاد الشي زاد فمعاناة السكان اللي ولات عندهم عزلة تامة، بلا حلول استعجالية وبلا تدخل يخفف عليهم هاد الأزمة.

أمام هاد الوضع، الساكنة كتطالب بتدخل عاجل لفتح الطرق وإصلاح القناطر اللي تضررات، وحماية المنازل المهددة بالانهيار أو الغرق، وفتح تحقيق فالأسباب الحقيقية وراء إغلاق القنطرة، باش ما يتعاودش نفس السيناريو مع أي شتا جاية.