كود سبور//
عبر طه بنغوزيل الكول ديال المنتخب الوطني المغربي لأقل من 17 عام على الفرحة ديالو بتأهل الأشبال إلى ربع نهائي كأس العالم U17 فأندونيسيا، بعدما ربحو اليوم الثلاثاء منتخب إيران فثمن النهائي، وأكد أنهم غيتقاتلو فالدور الجاي باش يفرحو المغاربة.
وتحدث طه بنغوزيل نجم المنتخب الوطني اللي تألق فصد ضربات ترجيح الإيرانيين، وقال فتصريح بعد الماتش: “كنا عارفين الماتش ديالنا، ورد الفعل ديالنا قدام إيران ملي تماركا علينا الهدف ماشي هو اللي كانت ضد الإكوادور، اليوم كنا ثايقين فريوسنا وليكوتش ديالنا عطاونا الثقة بزاف بلي الماتش ديالنا وما غنخسروهش وداكشي اللي قالوه لينا طبقناه.
وكمل الكول المغربي: “كنقول للمغاربة كاملين بلي ديما غيكونو فرحانين بنا.. قبل من الماتش طلبت الدراري وقلت لهم عفاكم غير هذا الماتش واخا أنا باغي نمشي حتى للفينال والحمد لله لوبجيكتيف الأول حققناه فتنا الويتيام فينال ودابا نمشيو نفكرو فربع النهائي”.
