گود سبور//

خسر المنتخب الوطني المغربي المحلي، ثاني ماتش له فكاس إفريقيا للمحليين، وهذا اليوم الاحد بالعاصمة الكينية نيروبي، أمام منتخب كينيا ضمن الجولة 3 من دور المجموعات.

وسالا الماتش بين المنتخب الوطني المغربي ومنتخب كينيا بنتيجة 1 لزيرو لمصلحة الكينيين، واللي قدرو يماركيو هدف الرباح فالدقيقة 41 بواسطة أوگام، وحافظو عليه حتى سالا الماتش واخا النقص العددي.

المنتخب الوطني المغربي كان مستواه فهاد الماتش متوسط بزاف، والخطوط ديالو كانت مشتتة واخا ضغطو اللاعبين باش يرجعو فالنتيجة ولكن الكينيين كانو واقفين مزيان فالتيران وقدرو يخرجو رابحين واخا من الشوط الأول وهما لاعبين غير بـ10 لاعبين بعد طرد لاعبهم ارامبو.

طارق السكتيوي مدرب المنتخب المغربي ما لقاش الحلول واخا التغييرات اللي دار، واللاعبين المغاربة كان غايب عليهم التركيز، وكانو متسرعين بزاف، ومركزين غير على الكرات طوال من الجهة اليمنى عن طريق مفيد، وهذا الشي زاد من ضعف الهجمات المغربية اللي ما كانش فيها التنويع.

وبهذه النتيجة تجمد رصيد المنتخب الوطني المغربي عند 3 نقاط، ومحتل دابا المركز الثالث خلف الكونگو الديمقراطية اللي عندها نفس الرصيد، أما المنتخب الكيني راه تأهل إلى ربع النهائي قبل جولة من نهاية دور المجموعات ودابا عندو 7 نقاط، ولاعب المنتخب المغربي الجولة الرابعة ضد منتخب زامبيا.