گود سبور//

معول المنتخب الوطني المغربي المحلي بقيادة طارق السكتيوي يبدا كأس أمم أفريقيا للمحليين، بنتيجة إيجابية ملي يلعب أول ماتش فالبطولة اليوم الاحد ضد منتخب أنگولا.

وكايتسناو عشاق كرة القدم الإفريقية، يشوفو بداية المنتخب الوطني المغربي المحلي كيفاش دايرا فالشان، خصوصا وأنه مكون من أحسن اللاعبين ديال فرق البطولة الاحترافية، بحال يوسف بلعمري ومحمد بولكسوت وربيع حريمات، وبالتالي فالرباح على أنگولا فأول ماتش من الشان كايبقى أحسن حاجة بالنسبة للمحليين باش يبداو البطولة ويعطيو مؤشر لكلشي بأنهم واجدين للمنافسة.

وبالنسبة لحكام الماتش بين المغرب وأنگولا، اختار الاتحاد الإفريقي لكرة القدم، الطاقم التحكيمي اللي غايلعب المباراة، ومكون من الكاميروني عبدو ميفير كحكم ساحة، والمواطن ديالو رودريگ ميني مبيلي كحكم مساعد أول، وسليم ألاو من البنين كحكم مساعد ثاني، وأديسا ليگالي كحكم رابع وحتى هو من البنين.

الماتش بين المنتخب الوطني المغربي المحلي ومنتخب أنگولا، غايبدا اليوم الاحد مع 4 العصر فتيران نايايو بالعاصمة الكينية نيروبي.