كود سبور//

عبرت جماهير أولمبيك آسفي على غضبها بسبب التحكيم فماتش الفريق ضد النهضة البركانية، اللي سالا بنتيجة التعادل 2-2 بين الفريقين، البارح الخميس فتيران بركان، برسم مؤجل الجولة 17 من البطولة الاحترافية، واعتبرت أن التحكيم فهاد الماتش ظلم الفريق بعدم احتساب ضربة جزاء للقرش المسفيوي إضافة إلى قرارات تحكيمية اخرى كانت مثيرة للجدل.

وخرج گروب “الشارك” المساند لأولمبيك آسفي ببلاغ احتج فيه على التحكيم فماتش نهضة بركان، وقال: “ماشي باش نشكيو ولا نبكيو، ولكن راه حق الفرقة ما عمرنا نسكتو عليه، ضربة الجزاء لي أجمع عليها كاع الحكام بأنها صحيحة وواضحة ماشي هي الظلم الوحيد لي كان فالمباراة، الحكم “صاگنا” بكل خبرة، سواء فقتل الماتش بصفارة فتواقيت مهمة، البطاقات لي ما كايتجبدوش، ناهيك على ضربة الجزاء لي باينة وواضحة وضوح الشمس على غرار شحال من ماتش تگدمنا فيه هاذ العام، و موراها خرجو باعترافات وتأكيد لحالات الأخطاء ولي ( مقصودة ) ولي ما استفدنا والو من اعترافاتهم، الخلاصة هي آسفي تتعكل ولكن بالنية والعزيمة حنا معاهم”.

وشكر جمهور أولمبيك آسفي لاعبين الفريق، وقال: “تحية للاعبين لي دارو ما فجهدهم، أربع انتصارات وتعادل خارج الديار، 13 نقطة من أصل 15 أحسن ما يمكن تجيب! طريق السلامة لكل المتنقلين، موعدنا الخميس المقبل فالعربي الزاولي”.