كود سبور//

عبر نسيم الشادلي لاعب الوداد الرياضي على الفرحة ديالو حيث تختار احسن لاعب فالفريق الأحمر لشهر سبتمبر الماضي، واكد انه كايلعب فالوداد مع لاعبين عندهم موهبة كبيرة وباغي يزيد يماركي ويتألق باش يفرح جمهور الحمرا اللي اعتبرو احسن جمهور بالنسبة له فالعالم.

وخلال فتصريح مع الموقع ديال نادي الوداد الرياضي، قال نسيم الشادلي: “بدينا البطولة بشكل سيء وبخسارة، ولكن من بعد قدرنا نعوضو هذا الشي وربحنا 2 ماتشات وتعادل، ودابا كانتمناو نكملو فهاد المستوى وداكشي اللي درنا فآخر ماتش مزيان ملي ماركينا 4 البيوتا، وفرحان حيث ختارني جمهور الوداد كأحسن لاعب فشهر شتنبر، وباغي نكمل فالخدمة باش يبقاو يختاروني احسن لاعب فگا الأشهر وفرحان بهذا الشي”.

وكمل الشادلي وقال: “كانلعب مع لاعبين كايعطيو بزاف فالتيران، وعندهم موهبة وامكانيات كبيرة، وانا فرحان حيث كانلعب معهم، وبغيت نكمل الشهر الجاي على بنفس الانطلاقة اللي بديت بها وأقوى ونزيد نماركي أهداف كثر وكثر وتقديم تمررات حاسمة باش نعاون الفريق، وعندنا احسن جمهور فالعالم اللي مستمر ديما فالمساندة ديالنا وتشجيعنا ومعهم وعلى قبلهم غانديرو موسم كبير وكانشكرهم بزاف بزاف”.