كود – وكالات //
«الشابة يا الشابة».. أغنية كافية باش ترجع الجمهور لسنوات من الذكريات والأفراح, بهاد النفس الفني، كيرجع الأسطورة الشاب خالد يفرض الحضور ديالو فوق خشبة المسرح، هاد المرة فالعاصمة الفرنسية باريس، فاحتفال استثنائي بمرور 50 عام على المسار الفني ديالو، تحت شعار «الأمس، اليوم وغدا».
الحفل اللي تحتضنو قاعة «دوم دو باريس»، نهار 31 أكتوبر وفاتح نونبر 2026، كيشكل محطة للاحتفاء بمسيرة واحد من أبرز الأسماء اللي ساهمات فانتشار موسيقى الراي عالميا. وخالد اختار يشارك هاد المناسبة مع الجمهور من خلال عرض موسيقي كيجمع بين أشهر الأعمال اللي صنعت الاسم ديالو، وبين ذكريات خمسين سنة من الغناء والإبداع.
والعرض كيعرف مشاركة أوركسترا «Paris One World Orchestra»، بقيادة المايسترو فريد عواومر، فتركيبة موسيقية كتجمع بين روح الراي والتوزيعات الأوركسترالية، باش تعطي للأغاني المعروفة ديالو نفسا فنيا مختلفا.
والإقبال على الحفل كان كبير، بعدما نفدات تذاكر عرض 31 أكتوبر، وهو الشي اللي دفع المنظمين يبرمجو ليلة إضافية نهار 1 نونبر.
ومن «ديدي» و«عائشة» حتى «عبد القادر» و«الشابة يا الشابة»، قدر الشاب خالد يبني رصيد موسيقي تجاوز الحدود، ورافق أجيالا مختلفة من الجمهور فالمغرب والجزائر وأوروبا ومناطق أخرى من العالم.