كود سبور//

قطر التونسي لسعد الشابي مدرب الرجاء الرياضي، الشمع على المسؤولين اللي عام ونص وهما سادين مركب محمد الخامس بالدار البيضاء بداعي الإصلاح، وهذا الشي اللي تسبب فخسائر الناديين الرجا والوداد.

وبعدما سالا الديربي بين الرجاء والوداد الرياضيين بالتعادل الإيجابي واحد لواحد بين الفريقين، قال لسعد الشابي مدرب الرجا فتصريح له: “اللي شفناه اليوم من الفراقي بجوج كاين فرق ملي كايلعبو فهذا التيران (ستاد دونور) وملي كايلعبو فتيران العربي الزاولي”.

وكمل لسعد الشابي وقال: “راه كاين فرق.. شفنا الوداد والرجا اليوم صعيب باش تربحهم فهذا التيران (ستاد دونور) وصعيب بزاف، وشفنا اليوم الفراقي بجوج ماي رجعو للتيران ديالهم قدمو كورة تمتعو بها الناس”.

للإشارة فماتش الديربي كان أول مباراة للرجا والوداد بمركب محمد الخامس بعد الإصلاحات، وعرف الماتش مقاطعة جماهير الفريقين له فقرار متحد منهم، احتجاجا على الفصل 507، اللي كايتحكمو به عدد من المشجعين، واحتجاجا على المنع من التنقل واحتجاج على مركب محمد الخامس اللي عام ونص وهو مسدود والفراقي تضررو من الإغلاق ديالو ماليا وحتى معنويا حيث الجمهور ما بقاش كايدخول بالكثرة يشجعهم بسبب حجم تيران العربي الزاولي اللي صغير.