گود سبور//

اعتبر التونسي لسعد الشابي مدرب الرجاء الرياضي، أن الفريق ديالو عرف كيفاش يربح رجاء بني ملال ويتأهل إلى ثمن نهائي كأس العرش، ووضح أن التغييرات اللي دار فالشوط الثاني كان لها دور مهم فحسم المباراة، واعترف بالغلط اللي دار ملي كان خرج بوكرين ضد المغرب التطواني فالبطولة الاحترافية، وبخصوص الديربي قال إنه مازال الحال عليه ودابا كايفكر فثمن نهائي كأس العرش.

وهضر لسعد الشابي مدرب الرجاء الرياضي بعد فوز الفريق الأخضر على رجاء بني ملال فسدس عشر نهائي كاس العرش بنتيجة 4-1، وقال فتصريح لجورنال “گود”: “عرفنا كيفاش نجيريو الماتش ضد رجاء بني ملال، والمباراة كانت صعيبة ضد فريق محترم بزاف، وهذا هو التشويق اللي كايكون فماتشات كأس العرش، وعرفنا كيفاش نحسموا الرباح فالأخير د المباراة درنا داكشي اللي خاصنا نديرو نماركيو اكثر من المنافس”.

وكمل لسعد الشابي وجاوب ملي سولو “گود” على دور ليشونجمون اللي دار فالدوزيام ميطا فحسم النتيجة للرجا، وقال: “سؤال باهي.. ديما المدرب كايحاول يدير ليشونجمون باش يحسن من الفريق ديالو، يمكن الماتش الماضي فالبطولة الاحترافية ضد المغرب التطواني بدلت صابر بوكرين بكري شويا، واللي يعترف بالغلط من الناس الكبار، واليوم حاولنا باش نبدلو السيستيم ديالنا والتغييرات تكون فالمستوى، والتغيير الأول خلى البديل السوسي يماركي هدف الثالث، والتغيير الثاني البديل العراسي حتى هو ماركا الهدف الرابع”.

وبخصوص الدريبي ضد الوداد الرياضي ضمن منافسات البطولة الاحترافية، كومونطا لسعد الشابي وقال: “دابا عندنا ماتش ديال كأس العرش ومازال بكري على ماتش الديربي”.