جواد الأنصاري_كود

—

السينما الهندية كتعتبر تقريبا من أضخم الانتاجات على المستوى العالمي من حيث كونها كتنتج ما يناهز ربع العالم حاليا من الانتاج ديال الأفلام، وبلغات مختلفة ،وبما يزيد عن 13 ألف دار عرض وتصل نسبة المشاهدة ديالها حسب الاحصائيا إلى 15 لمليون مشاهد يوميا ،والملفت للإنتباه في كاع الافلام الهندية هو ديك الصورة النمطية والمتكررة شحال من مرة دون ملل ولا كلل ،ولي جزء كبير منها يتمركز حول ثنائية الحب والإنتقام فيما الباقي كلو بكائيات وموضوع الطائفية والاستعراض الغنائي وهادشي كاملو أكيد متأثر نوعا ما بالارث الثقافي العميق ديال الهنود .

والحديث عن الافلام الهندية غادي يجعلنا نقومو بإستعادة نوستالجيا الزمن الجميل وأفلام من طينة دوستي ديال الستينات ،للي مايمكنش تلقى لي ما بكاش فيه ديك الوقيتة نهائيا، وللي كان ترجمو ابراهيم السايح للدارجة ولي بالمناسبة ترجم على غراره ايضا بزاف ديال الافلام للي دازو ف التلفزة المغربية شحال من مرة..و زيد عليه الفيلم الاسطورة “أمنا الأرض ،ودراموندرا للي خلات واحد الانبطاع قوي عند بزاف ديال المغاربة فديك الحقبة ديال التمانينات والتسعينات، والممثل لي كان في الواجهة وقتها شامي كابور وأميتاب باتشان ، بالإضافة “لشاعير” لي كان يتربع على عرش قائمة المتابعين

و السر ديال تعلق لمغاربة بلهنود فديك لفترة ديال التسعينات والتمانينات كان بفضل شخصية موتي شاندرا ماني، لي كان كيبيع لحوايج فطنجة لي كانت ديك الساعة مدينة دولية خلال فترة الحماية، وإتجه “هاد شاندرا ماني” إلى الاشتغال على إستيراد الافلام الهندية “لكونطر بوند” من لهند وكيجيبها لمغرب  وكيسوقها، ولي ساهم معه فهاد القضية علي محمد الحسيني لي كان كيترجم دوك الافلام ولي غينتقل من بعد كمترجم معتمد في المركز السينمائي المغربي،

ومن تم اكتسحو الافلام الهندية المشهد المغربي واحد لمدة طويييلة بديك النمطية المملة لي دوينا عليها ،إلى غضون الاونة الاخيرة لي عرفت واحد الموجة متطورة  شوية ولي شكلت الاستثناء على ديك القاعدة لي معروفة على لهنود و للي بدات كتهرس نوعا ما من ديك التيمة المتكررة ودوك لكليشيهات وهادشي بدا مثلا مع فيلم ماي نام ايز خان وأفلام اخرى بحال  pkو three idiots …

وإختصاراً وعلى ضوء كل ما قيل :

في إعتقادي الخاص كنشوف بلا كاع لي باقي لحد الساعة مهووس بدوك الافلام الهندية ،أنه مجرد منونخ فكريا وإجتماعيا ونفسيا،وكيبان على كونو غير سوي عقليا، لانه بالله عليكم ما الشيء الذي يُغري في افلام ليستوار ديالهم تسعود وتسعين فلمية كتدور حول واحد كيبغي وحدة وباها دار ليهم لعصا فرويدة، وفي الاخير لبطل كيعلق مع لبطلة ،وكيمشيو لشي جنان وكتهرب ليه ،وكتمشي تخبى ورا شي شجرة وفجأة كيقلبوها شطيح ورديح ؟؟؟؟؟….. أش هاد ا؟