كود الرباط//

عاينت “گود” مساء أمس الخميس 27 يوليوز 2024، ممارسات غريبة تقوم بها شركة بيع السجائر الإلكترونية، وذلك بإحدى المقاهي المشهور في أكدال بالقرب من شارع عقبة.

هاد الشركة كتبيع منتوجات إيكوس، جاو مستخدمين او متعاونين كيديرو ليها إشهار ودايرين لوگو ديالها فلباسهم وهازين بواطات فيهم السجائر، كيشرحو للزبناء فهاد المقهى مميزات هاد النوع من السجائر وفوائدها وكثر من هادشي كيعطيوهم يجربو يكميو.

هادو محترمو لا قانون ولا صحة عامة وكيشهرو بحاجات خصها تكون أصلا ممنوعة لأنها مضرة بالصحة.

هاد الشركة كادير شي فعايل فشكل، حتى أنها غلبات البرلمان أثناء التصويت على قانون مالية 2023، والكل عارف كيفاش  لجنة المالية صوتت بالإجماع على تعديل تقدمت به فرق الأغلبية البرلمانية في مشروع قانون مالية 2023، يقضي بالرفع في الرسم عند الاستيراد المطبق على السجائر الإلكترونية من 2.5 إلى 40 في المائة.

التعديل آنذاك يعني أن السجائر الإلكترونية غاد يرتافع ثمنها بزاف. تبرير التعديل جا فيه ’’استهلاك السجائر الإلكترونية في المغرب عرف ارتفاعا ملحوظا خلال السنوات الأخيرة، لذلك تقترح الأغلبية رفع رسم الاستيراد من 2.5 في المائة إلى 40 في المائة على السجائر الإلكترونية والأجهزة الكهربائية المماثلة بهدف الحد من انتشارها‘‘.

لكن اللي وقع أن شركة فيليب موريس رابحة من هاد التعديل وبزاف. حقاش ارتفاع الرسوم الجمركية شملات غير السجائر الإلكترونية اللي كتلاح ’’جوتابل‘‘ اللي كتسمى ’’الڤابو‘‘، والغريب فهاد التعديل أن ماركة إلكترونية من گارو الشركة العالمية “فيليب موريس” اللي كتباع ما بين 400 و1200 درهم ما غادياش تقاس فالرسوم الجمركية. ما مسوقاش لا فرق الأغلبية ولا فرق المعارضة فمجلس النواب. هادشي فميزانية 2023.

هاد الضومين ديال السجائر الإكترونية فيه لوبي كبير وكبير بزاف خدام فقطاع الصحة خصوصا البريفي بلا حيا بلا حشمة من خلال أطباء بلا ضمير كيدافعو على هاد النوع من السجائر وفيه نواب كيدافعو على هاد الماركة وفيهم حتى شي صحافة كتسوق لهاد الماركة. اللوبي عندهم خدام مزيان فبلادنا وكلشي عارف هاد الشي.