علي الصافي كود//

بان من جديد أن المواطنين والشعوب ديال الدول المعادية للمغرب وللوحدة الترابية ديالو، ما عندهمش حتى مشكل مع المملكة المغربية، وبالعكس كايبغيو المغرب والمغاربة، وهذا الشي تأكد مرة اخرى والدور جا على الجنوب إفريقي رولاني موكوينا مدرب الوداد الرياضي ملي لبس الدراعية وعبر على الحب ديالو للمغرب حيث المغاربة بغاوه وتعاملو معه مزيان.

رولاني موكوينا المدرب الجنوب إفريقي الشاب وواحد من أشهر الشخصيات فالمجال الرياضي بجنوب إفريقيا والقارة الافريقية خلال السنوات الماضية، خدا هدية من عند مكونات نادي شباب المسيرة العيون قبل الماتش مع الوداد فدوري التميز، ولبسها وكان فرحان بزاف ومتأثر بالحب والكرم اللي عطاوه له المغاربة من الشمال حتى الجنوب، وهو بدورو بادرهم الحب.

موكوينا بحالو بحال بزاف من المواطنين الجنوب إفريقيين، عبر على الحب للمغرب وللمغاربة، واستغل هذه الفرصة وقال أنه فرحان بزاف بالهدية اللي عطاوه شباب المسيرة العيون، وانه تأثر بها ولدرجة انه جاتو البكيا، وقال أن هذا الكادو ديال الدراعية هو دليل على حب المغاربة له، واخا مازال ما قدم والو للوداد الرياضي، وقال ايضا ان شباب المسيرة العيون بهذا الجيست الزوين اللي دارو معه كسبو المحبة ديالو، وانه ولى كايبغي هذا الفريق الممثل للأقاليم الجنوبية المغربية.

طبعا كلشي كايعرف الموقف العدائي ديال الحكومة الجنوب إفريقية لمغربية الصحرا، ولكن تصرف رولاني موكوينا، والدراعية اللي خدا من عند شباب المسيرة وانه يلبسها ويفرح بها، فهذا تأكيد على ان المواطنين فجنوب إفريقيا والشعب تماك، ما عندهم حتى مشكل تجاه مغربية الصحرا، وان المشكل هو غير عند “حزب المؤتمر الوطني الافريقي” اللي سنوات وهو فالحكم فجنوب إفريقيا، وكايبين العداء للمغرب بلا مبرر، وكايدعم الانفصاليين ديال البوليساريو بمساعدة الجزائر، اللي حتى بزاف من المواطنين ديالها موقفهم مساند لمغربية الصحرا عكس الدولية الجزائرية اللي محتضنة للبوليساريو عقود هادي.

الموقف ديال رولاني موكوينا هو مكسب جديد للديبلوماسية المغربية الموازية، حيث المدرب الجنوب إفريقي عندو معجبين كثار فبلادو، وبزاف ديال الجنوب إفريقيين كايبغيوه وعزيز عليهم، وأكيد ملي غايشوفو التعامل الزوين ديال المغاربة معه ومحبتهم له غايتأثرو كيفما تأثر هو وعبر على ذلك بصدق، حيث كن ما كانش صادق ما كانش غايلبس الدراعية وكان غايدير لشباب المسيرة العيون خاطرهم وياخد الهدية من عندهم وصافي، ولكن موكوينا كان مصر على أنه يلبس الدراعية ويتصور بها، والأكثر من هذا فهو عبر على الحب ديالو للمغرب وبصدق وهذا الشي راه قدام وسائل الإعلام، ومدرب بحال موكوينا بشخصيتو القوية ماشي غايجي ويعترف بهذا الشي إلا وهو اعتراف صحيح ومن قلبو.