الرئيسية > آراء > السياحة الداخلية رجعات المغرب عبارة على زبالة كبيرة حيت بزاف ديال المغاربة ممربيينش والدولة عمرها فكرات تربيهم بالتعليم والغرامات
20/07/2020 19:00 آراء

السياحة الداخلية رجعات المغرب عبارة على زبالة كبيرة حيت بزاف ديال المغاربة ممربيينش والدولة عمرها فكرات تربيهم بالتعليم والغرامات

السياحة الداخلية رجعات المغرب عبارة على زبالة كبيرة حيت بزاف ديال المغاربة ممربيينش والدولة عمرها فكرات تربيهم بالتعليم والغرامات

محمد سقراط-كود//

المناظر الطبيعية في المغرب عبارة على زبالة كبيرة والسياحة الداخلية هي السباب، لأن أي بلاصة سياحية في المغرب كيوصلوها المغاربة سواء عائلات ولا أفراد كيردوها زبالة كبيرة، أي بلاصة مشيت ليها وكتوصل ليها الطوموبيل كنلقاها عامرة زبل بداها من شواطئ الناظور لي جات غابرة في الجبل وصولا للجبال نواحي أزيلال أو تنغير أو شواطئ إيفني، كاينة كارثة حقيقية ديال الزبل وعدم إحترام البيئة وديك الهدرة ديال خلي بلاصتك نقية غير إشاعة، غابة صغيرة جات في طريق معزولة في طريق بومية وقفت نتغدى فيهات لقيتها عامرة زبل وليكوش وقراعي دالشراب، من هاد الناحية المغاربة خربو بلادهم شعبا ودولة.

كاين بزاف ديال الفيديوات ديال أجانب كيزورو المغرب وكيمشيو لشي بلاصة زوينة بزاف ولكن للأسف كيلقاوها عامرة زبل وكيبداو يجمعوه، بحال لي دارو واحد الألمان فمولاي بوسلهام، وبحال لي دارو واحد الدنماركيين فالعرايش بغاو يباتو فطوموبيلتهم فواحد البلاصة جيهة المرصى وهوما يلقاوها مدفونة زبل وناضو كيجمعوا منظر زوين ليهم ولكنه مخجل وعار لينا حنا كمغاربة، وطبعا كاين بزاف ديال المبادرات بحال هادي لم يجري توثيقها، ولكن كاين ناس كتبقى فيها الطبيعة وكتبغي تنقي زبل الناس لخريين، الموشكيل عند المغاربة هو أمن هادشي ماشي حتى طبقي بزاف، حيت عادي تتوقع من واحد ماقاريش مقودة عليه ساخط على الوضعية أنه يلوح الزبل في الشارع، ولكن راه كاين شباب قاريين وواعيين وبيخير عليهم وكيوقف فالسطوب ويلوح الزبل ديال ماكدو من طوموبيلتو وسط السطوب ويزيد عادي جدا، وكاين براهش حدا عائلاتهم كيلوحو الزبل وتاواحد من عائلاتهم مكينبههم لأنه سلوك مستهجن وماخاصوش يدار داكشي.

أنا نيت كنت كنلوح الزبل فأي بلاصة المهم هو نتخلص منو مايبقاش موشكلتي ويولي مشكلة لخريين، أقصى ما كنت كندير هو كاع نجمعو فميكة ونحطو فشي قنت حتى يجيز عمة شي حد يجمعو، ديك اللعبة ديال هادا جهدي عليك البلاد، وطبعا مكيجي حد يجمعو من غير شي كلب او مش كيشتتو كامل، ولكن مع المدة بديتك كنتلاقى ناس حسن مني وعلموني أنا داكشي راه سلوك كثر من حيواني، وأنا ني تبديت نوعى بهاد الموشكيل ملي وليت نخرج للطبيعة ونزور المناطق السياحية الطبيعية عاد بديت نوعى بهاد الموشكيل، ولكن ملي وعيت بيه أنا كمواطن لقيت أن الدولة براسها مواعياش بيه، ديما جيابي والصاكادو ديالي او الطوموبيل عامرين زبل حيت مكاينش فين نحطو برا وخاص نبقى محتافظ بيه حتى نرجع للدار أو ندخل للمدينة ونلوحو فشي طارو، أنا ستغرقت وقت كبير باش نوصل لهادشي ولكن راه في الأصل خاص نترباو على هادشي منذ الطفولة وفي المدرسة بالخصوص يكونوا حملات أسبوعية ديال تلاميذ كيمشيو وينضفو الغابات لي حداهم ورحلات توعوية ديال هادشي باش الطفل يكبر فيه حب النظافة والحضارة، وطبعا خاص يكونوا غرامات كبيرة على الأسر ولأفراد وطبعا خاص الدولة تجهز البنية التحتية باش مايبقاش عند الناس مبرر، حيت راه حشومة وعيب وعار أنك تضرب الطريق وتلقى مناظر طبيعية مكايناش عند نص بلدان العالم بهاد التنوع وفي اللخر تلقاها عامرة زبل.

موضوعات أخرى