كود – كازا //
ما بقاتش السياسة غير فالبرلمان والزنقة، دابا ولات حتى فالتلفون، دراسة جديدة كتسلط الضو على الحضور المتزايد للأحزاب المغربية فالسوشيال ميديا، وكتحذر فالمقابل من مخاطر التضليل والتلاعب بالخوارزميات وتأثيرهما على النقاش الديمقراطي.
هاد الدراسة خرجاتها مجموعة العمل المكلفة بالتقنين ووسائل الإعلام الرقمية، اللي كترأسها نرجس الرغاي، عضوة المجلس الأعلى للاتصال السمعي البصري بعنوان: «منصات التواصل الاجتماعي والاتصال السياسي بين الأثر ومخاطر التضليل».
ما بين يناير وماي 2026، رصدات الدراسة نشاط رقمي ديال 12 حزب مغربي فالفايسبوك لي سجل 2651 منشور، مقابل 925 فيديو على تيك توك عند 6 أحزاب، و507 فيديوهات على يوتيوب عند 5 أحزاب، بينما نشرو 4 أحزاب 1012 منشور على منصة إكس.
وكتشوف الدراسة أن منصات التواصل ولات فضاء مؤثراً فالحياة الديمقراطية، حيث كتسمح بالتعبير والتفاعل، ولكن كتفتح فالمقابل المجال للتضليل الإعلامي، والاستقطاب السياسي، والتلاعب بالخوارزميات.
نرجس الرغاي كتعتبر أن هاد التحولات كتطرح تحديات حقيقية على جودة الحوار الديمقراطي، خصوصاً مع قدرة التضليل والتلاعب بالخوارزميات على التأثير فتصور المواطنين للواقع السياسي، كيف ما كتحذر من خطر «ديمقراطية خاضعة للخوارزميات» فظل الغموض اللي كيحيط بعملها وتركيز قوة كبيرة عند عمالقة الإنترنت.
ولمواجهة هاد المخاطر، كتأكد الدراسة على أهمية الشفافية، والمراقبة المواطنة، والتربية على الإعلام الرقمي، وتنويع مصادر الأخبار.
وعلى مستوى المنصات، فايسبوك باقي الأكثر حضور فالتواصل وتبادل الآراء، كيف ما كيلعب تيك توك دور كبير فالانتشار السريع وسط الشباب.
يوتيوب كيوفر إمكانيات للسرد والتفسير مازال ما تستغلاتش بشكل كافٍ، وإكس كتميزو سرعة التفاعل ونقل الرسائل.
أما المواقع الإلكترونية ديال الأحزاب، فكتبقى عندها طابع رسمي ومؤسساتي، ولكن بجاذبية محدودة عند المواطنين.
وبالنسبة للدراسة، ماشي غير المنصات اللي خاصها تنظيم، ولكن حتى طريقة تعامل المواطنين والمؤسسات والمجتمع المدني معها، بترسيخ ثقافة رقمية مسؤولة وتقوية التربية على الإعلام الرقمي.
الحاصول ، كتعتبر الرغاي أن المغرب محتاج لمنظومة خاصة بتنظيم المجال الرقمي، كتوازن بين احترام الثوابت الوطنية والانفتاح والابتكار، مع حماية الحقوق الفردية.